वासिङ्टन– अमेरिकी अन्तरिक्ष संस्था नासाले विश्वकै सर्वाधिक शक्तिशाली रकेटको सफल परीक्षण गरेको छ।
अस्तित्वमा रहेका रकेटमध्ये सबैभन्दा शक्तिशाली रहेको स्पेस लन्च सिस्टम (एसएलएस) नामक रकेटलाई नासाले परीक्षण गरेको हो।
रकेटको कोर स्टेजका इन्जिनहरूलाई आठ मिनटभन्दा लामो समयसम्म चलाइएको थियो। त्यो भनेको उक्त रकेटलाई पृथ्वीबाट अन्तरीक्षसम्म पुग्न लाग्ने समय हो।
एसएलएसको सबैभन्दा ठूलो भागको यो दोश्रो परीक्षण हो। गत जनवरीमा गरिएको परीक्षणको प्रयास छिटै बन्द गरिएको थियो।
स्मरण रहोस् यही रकेटबाट चन्द्रमामा मानिसलाई पठाउने योजना नासाको छ। अर्थात् एसएलएसमै चढेर सन् १९७२ पछि पहिलोपटक चन्द्रमामा मानिसलाई पठाइनेछ।
यो मिसन सन् २०१७ मा तत्कालीन अमेरिकी राष्ट्रपति डोनाल्ड ट्रम्पले सुरुवात गरेको नासाको आर्टेमिस परियोजनाको भाग रहेको बताइएको छ।
यो रकेटमा चारवटा शक्तिशाली आरएस २५ इन्जिनहरूका साथै इन्जिनको साथमा दुईवटा बुस्टर जोडिएका छन्।
अमेरिकाको मिसिसिपीस्थित स्टेन्निस स्पेस सेन्टरमा बिहीबार उक्त परीक्षण गरिएको थियो। उक्त रकेट परीक्षणका क्रममा निस्किएको धुवाँको मुस्लो निकै विशाल रहेको र उक्त मुस्लो अन्तरीक्षबाट समेत देखिएको थियो।
नासाका अधिकारीका अनुसार रकेट परीक्षण अत्यन्तै सफल भएको छ। अमेरिकी संसदको अन्तरीक्ष तथा प्रविधि समितिले समेत परीक्षणको सफलताका लागि नासालाई बधाई दिएको छ।
बिहिबारको परीक्षणमा प्रयोग गरिएको रकेटको मुख्य भाग सन् २०२१ मा तय गरिएको एसएलएसको पहिलो चन्द्र उडानमा समेत प्रयोग हुनेछ।
परीक्षण अगाडि उक्त रकेटमा इन्जिनियरहरुले २६ लाख लिटर प्रोपेलेन्ट इन्धन भरेका थिए। प्रोपेलेन्टमा तरल हाइड्रोजन हुन्छ, जसले रकेटको इन्धनको काम गर्छ भने इन्धन दहनका लागि तरल अक्सिजनसमेत हुन्छ।
