काठमाडौं- देशैभर उच्च गतिको ब्रोडब्यान्ड इन्टरनेट पुर्याउने लक्ष्यसहित नेपाल दूरसञ्चार प्राधिकरणले अघि बढाएका १८ परियोजनाको झन्डै ७५ प्रतिशतभन्दा बढी प्रगति भएको छ, जसमा ५२ सय २५ विद्यालयमा ब्रोडब्यान्ड इन्टरनेट पुगेको छ।
फागुन मसान्तसम्म ग्रामीण दूरसञ्चार विकास कोषबाट सञ्चालित परियोजनाअन्तर्गत ब्रोडब्यान्ड सेवा उपलब्ध गराउने १८ मध्ये १३ वटा प्याकेजमार्फत ५० जिल्ला तोकिएका थिए। सोहीबमोजिमका स्थानमा सात प्रतिशत र दुईवटा प्याकेजमार्फत १० जिल्लामा तोकिएबमोजिमका स्थानमा ५० प्रतिशतभन्दा बढी काम सकिएको प्राधिकरणको दाबी छ।
साथै तीनवटा प्याकेजमार्फत १४ जिल्लाका लागि तोकिएबमोजिमका स्थानमा नेटवर्क तथा कनेक्टिभिटी जडानका लागि सेवा प्रदायक छनोट भई निर्माणको काम भइरहेको प्राधिकरणले जनाएको छ ।
प्राधिकरणले ग्रामीण दूरसञ्चार विकास कोषको रकम प्रयोग गरी ब्रोडब्यान्ड इन्टरनेट सेवा उपलब्ध गराउनेसम्बन्धी परियोजनालाई १८ वटा प्याकेज बनाएर सञ्चालन गरेको थियो। प्राधिकरणका अनुसार १८ प्याकेजमध्ये हालसम्म १५ हजार ९ सय ८२ स्थानमा इन्टरनेट जडान सम्पन्न भएको छ।
हालसम्म ७०२ स्थानीय तह, ५ हजार ९३३ वडा कार्यालय तथा ५ हजार २ सय २५ माध्यमिक विद्यालय तथा ४ हजार १२२ स्वास्थ्य संस्था रहेका छन्। प्राधिकरणले हालसम्म २ अर्ब ९८ करोड रुपैयाँमा ब्रोडब्यान्ड परियोजनाका लागि सेवा प्रदायकहरूलाई भुक्तानी गरिसकेको छ।
