काठमाडौं- कलाकारहरूले विजया दशमी धुमधामसँग मनाएका छन्।
अभिभावकबाट बडादशैंको टीका ग्रहण गरेका तस्बिरहरू कलाकारहरूले सामाजिक सञ्जालमार्फत् सार्वजनिक गरेका छन्।
नेपालकी पहिलो अभिनेत्री भुवन चन्दले श्रीमान् माइकल चन्दको हातबाट टीका ग्रहण गरेपछि परिवारका अन्य सदस्यलाई पनि टीका लगाइदिएकी छन्। यस्तै, अभिनेता हरिवंश आचार्यले स्वर्गीय श्रीमती मिरा आचार्यको तस्बिर अगाडि राखेर पत्नी, छोरा र बुहारीलाई टीका लगाइदिएका छन्।
अभिनेता अनमोल केसीले पिता तथा अभिनेता भुवन केसीको हातबाट टीका र जमरा थापेर आशिर्वाद लिएका छन्। ‘छड्के २’ को छायांकनमा व्यस्त अनमोल लगत्तै ‘जेरी’मा व्यस्त रहने छन्।
अभिनेत्री सुहाना थापाले बुबा सुनिलकुमार थापा र आमा झरना थापाबाट टीका ग्रहण गरेकी छन्। अभिनेत्री तथा निर्देशक दीपाश्री निरौलाले बुवाबाट, अभिनेता तथा निर्देशक निर्मल शर्माले आमाबाट र अभिनेता जितु नेपालले आमाको हातबाट टीका ग्रहण गरेका छन्।
यस्तै, आमाबाट टिका र जमरा ग्रहण गरेपछि सामुहिक तस्बिर खिचाउँदै हास्य कलाकार शिवशंकर रिजालले दशैंको शुभकामना दिएका छन्। ‘तराई गएर अन्य मान्यजनबाट टीका ग्रहण गर्नेछु। मेरो दशैं तराई र काठमाडौंमा बराबर हुँदै आएको छ,’ उनले सामाजिक सञ्जालमा लेखेका छन्।
