काठमाडौँ । पछिल्लो समय सिद्धार्थनगर नगरपालिकामा सार्वजनिक शौचालय नहुँदा समस्या बढेको छ । नगरपालिकाले निर्माण गरेको शौचालयमा भने ताला लगाएर राखिएको छ ।
यसअघिको नगर प्रमुख हुँदा शौचालय सञ्चालनमा ल्याउने तयारी हुँदै ग र्दा स्थानीय तहको निर्वाचन सुरु भएकाले हस्तान्तरण हुन नसकेको हो । नयाँ नेतृत्व आएको दुई महिनाभन्दा बढी भए पनि शौचालयको ताला खुलाएको छैन । संचारकर्मीको टोली सिद्धार्थ नगर पुगेर जवाफ माग्ने प्रयास गरेको थियो । तर, कसैले प्रतिक्रिया जनाउन चाहेनन् ।
यता स्थानीयबासीले नगरपालिकाको कामप्रति असन्तुष्टि जनाउँदै आएका छन् । नगरपालिकाका स्थानीय व्यवसायी ओमकार गौचनले आफूहरूकै पहलमा लामो संघर्षपछि शौचालय निर्माण भएको तर सञ्चालनमा नआउनु बिडम्वना भएको बताए ।
नगरपालिकाको वडा नं ११ निवासी सीता मरासिनीले शौचालय सञ्चालन गर्न नसक्ने भए निर्माण गर्नुको औचित्य नभएको बताइन् । नगरपालिकाको वडा नं ५ निवासी पुनम गेलालले सार्वजनिक शौचालय नहुँदा समस्या भएको बताउँदै छिटो सञ्चालनमा ल्याउनु पर्ने बताइन् ।
नगरपालिकाले बेलहियादेखि बुद्धचोकसम्म छ वटा शौचालय ४६ लाख २८ हजार रुपैयाँ लागतमा बनाएको हो ।