काठमाडौँ । चीनको उत्तर पश्चिमी चिङ्हाई प्रान्तमा आएको बाढीमा परेर कम्तीमा पनि १७ जनाको मृत्यु भएको छ । अधिकारीहरूले दिएको जानकारीअनुसार बिहीबार साँझको बाढीबाट अरु १७ जना बेपत्ता भएका छन् ।
ती हराएका व्यक्तिको खोजी भइरहेको बताइएको भए पनि भेटिने सम्भावना कम रहेको उद्धारकर्मीले जनाएका छन् । स्थानीय समयानुसार बुधबार राति १०.२५ देखि सुरु भएको भीषण वर्षाका कारण ठूलो बाढी आएको र धनजनको क्षति भएको जनाइएको छ ।
धेरै माटो बोकेर आएको बाढीले नदीको वहाव परिवर्तन गरेकाले धेरै क्षति भएको अधिकारीहरुले जनाएका छन् ।बाढीबाट छ गाउँका छ हजार २४५ घर प्रभावित भएका छन् । तीमध्ये दुई भवन पूर्ण रुपमा र १४ भवन अत्यधिक क्षति भएको छ ।
बाढीले घरमा क्षति भएपछि एक हजार दुई सयभन्दा बढी मानिस विस्थापित भएका छन् । उनीहरूका लागि अत्यावश्यक सहयोग र सामग्रीको व्यवस्था गर्न लागिएको छ । उनीहरुलाई अस्थायी शिविरमा राखिएको छ ।
सेना प्रहरी र उद्धारकर्मी गरी कम्तीमा चार हजार पाँच सय जना उद्धारका काममा खटिएका छन् । उनीहरुले बिहीबार बिहानदेखि हराएका २० जना व्यक्तिको सकुशल उद्धार गरेको जनाएका छन् ।
