कैलाली । हरितालिका तीजको अवसरमा धनगढीस्थित शिवपुरी धाममा महिलाहरूले भक्तिभावपूर्वक पूजा–आराधना गरेका छन्।

तीजको अवसरमा बिहानैदेखि शिवपुरी धाममा व्रतालु तथा श्रद्धालु महिलाहरूको उपस्थिति बढेको थियो। महिलाहरूले भगवान् शिवको पूजा–आराधना गर्दै सुख, शान्ति, समृद्धि तथा परिवारको दीर्घायुको कामना गरेका थिए।

तीजका अवसरमा महिलाहरू रातो पहिरनमा सजिएर शिवपुरी धाम पुगेका थिए। धाम परिसरमा पूजा–आराधनासँगै तीजका गीत तथा नृत्यले धार्मिक वातावरणलाई थप उल्लासमय बनाएको थियो।

धनगढीको प्रमुख धार्मिक तथा पर्यटकीयस्थलका रूपमा परिचित शिवपुरी धाममा तीज लगायत विभिन्न धार्मिक पर्वमा श्रद्धालुहरूको उल्लेख्य सहभागिता हुने गरेको छ। धाममा रहेको विशाल शिवलिङ्ग तथा धार्मिक संरचनाका कारण पछिल्लो समय शिवपुरी धार्मिक पर्यटकीय गन्तव्यका रूपमा समेत विकास हुँदै गएको छ।