काठमाडौँ । रसुवागढी हाइड्रोपावरको आईपीओमा १० साउनसम्म आवेदन दिन पाइने भएको छ । कम्पनीले समय थप गरेपछि १० साउनसम्म आवेदन भर्न मिल्ने भएको हो ।
रसुवागढीले आयोजना प्रभावित स्थानीय बासिन्दालाई आईपीओ बिक्री खुला गरेको हो । रसुवागढीले १३ असारबाट एक सय अंकित मूल्यमा ६८ लाख ४२ हजार १०० कित्ता सेयर निष्कासन गरेको थियो।
आयोजनाबाट अति प्रभावित क्षेत्र गोसाइँकुण्ड, वडा नम्बर १ थुमन र वडा नम्बर २ टिमेरे तथा प्रभावित क्षेत्र आमाछोदिङमो गाउँपालिका वडा नम्बर ४ गोल्जुङ र वडा नम्बर ५ चिलिमेका बासिन्दाले आवेदन दिन सक्नेछन् ।
यस्तै, गोसाइँकुण्ड गाउँपालिकाका बाँकी वडाहरू, वडा नम्बर ३ बृद्धम, वडा नम्बर ४ लाङटाङ, वडा नम्बर ५ स्याफ्रुबेसी र वडा नम्बर ६ धुन्चेका स्थानीयले पनि आवेदन दिन सक्ने छन् ।
सामान्य प्रभावित बाँकी जिल्लाका सबै बासिन्दाले पनि आवेदन दिन सक्ने छन् । स्थानीयले न्यूनतम १० कित्तादेखि अधिकतम ७०० कित्तासम्म आवेदन दिन सक्ने छन् । यो आईपीओमा सिद्धार्थ क्यापिटल बिक्री प्रबन्धक रहेको छ ।
यस्तै, सह निष्कासन तथा बिक्री प्रबन्धकमा एनआईबीएल एस क्यापिटल, ग्लोबल आईएमई क्यापिटल र सनराइज क्यापिटल रहेका छन् । यसमा सी आस्वा प्राप्त बैंक तथा वित्तीय संस्थाबाट आवेदन दिन सकिने छ ।