काठमाडौँ । श्रीलंकाका राष्ट्रपति गोटाबाया राजापाक्ष बुधबार भागेर माल्दिभ्सको भेलाना अन्तर्राष्ट्रिय विमानस्थलमा अवतरण गरेका छन् ।
माल्दिभियाली सञ्चारमाध्यमलाई उद्धृत गर्दै राष्ट्रपति गोटाबाया पत्नी र एक अंग रक्षकसँग एन्टोनोभ ३२ सैन्य विमानमा माल्दिभ्स पुगेको प्रधानमन्त्रीको कार्यालय स्रोतलाई उद्धृत गरी स्थानीय सञ्चार माध्यमले जनाएका छन् ।
राजपाक्षले सोमबार आफ्नो राजीनामा पत्रमा हस्ताक्षर गरेका थिए । उक्त राजीनामा पत्र सभामुखलाई बुझाइने र राष्ट्रपतिको राजीनामाको औपचारिक घोषणा संसदबाट गरिने कार्यक्रम रहेको प्रधानमन्त्रीको कार्यालयका एक अधिकारीले बताए ।
यसैबीच श्रीलंकाका प्रधानमन्त्री रानिल विक्रमसिंघेले बुधबार आपत्कालीन अवस्थाको घोषणा गरेका छन् । माल्दिभ्समा राष्ट्रपति गोटाबाया राजपाक्ष गएको खबरपछि सम्भावित हिंसात्मक गतिविधिलाई मध्यनजर गर्दै देशको पश्चिमी प्रान्तमा कर्फ्यू लगाइएको छ ।
प्रधानमन्त्री विक्रेमेसिंघेको निवासबाहिर तैनाथ सुरक्षाकर्मीले अश्रु ग्यास प्रयोग गरी प्रदर्शनकारीलाई तितरवितर पारेको समाचारमा जनाइएको छ । उनले दंगा मच्चाउनेलाई गिरफ्तार गर्ने ठाडो आदेश दिएको श्रीलंकाको डेली मिरर पत्रिकाले जनाएको छ ।
श्रीलंकाको विदेश मन्त्रालयका एक पूर्व सल्लाहाकारले भने, ‘हामी प्रधानमन्त्रीको पनि राजीनामा चाहन्छौं किनकि राष्ट्रपतिले राजीनामा दिएमा हाम्रो संविधानअनुसार प्रधानमन्त्री कार्यवाहक राष्ट्रपति बन्ने छन्, नागरिकले उनीहरू दुवै असफल भएको देखिसकेका छन्, उनीहरू दुवै पदच्युत हुनुको विकल्प छैन ।’
