कोलम्बो- श्रीलंकामा राष्ट्रपति गोटाबाया राजापाक्षेको सरकारी निवास कब्जा गरेका प्रदर्शनकारीहरू स्विमिङमा मस्ती गरिरहेको देखिएका छन्।
शनिबार आफ्नो निवास प्रदर्शनकारीले कब्जामा लिएपछि राष्ट्रपति राजापाक्षे त्यहाँबाट भागेका छन्। सबै सरकारी अवरोध छिचोल्दै राष्ट्रपति निवासमा घुसेका प्रदर्शनकारीले भवनभित्र मस्ती गरिरहेका छन्।
शनिबार दिउँसो करिब १ बजे प्रदर्शनकारीले राष्ट्रपति निवास कब्जामा लिएका हुन्। उनीहरूले ‘गोटा गो होम’लगायत नारा लगाएका थिए।
प्रदर्शनकारीले सामाजिक सञ्जालमा अपलोड गरेका भिडियो र तस्बिरमा उनीहरू स्विमिङ पुलमा पौडी खेलिरहेको देखिन्छ। र, बेड रुम र सोफामा आराम गरिरहेका छन्।
सरकारी अधिकारीहरूका अनुसार राष्ट्रपति राजापाक्षे सुरक्षित स्थलमा गएका छन्। उनी कहाँ गए भन्ने खुलाइएको छैन।
प्रदर्शनकारीलाई रोक्न प्रहरी र सेनाले अश्रु ग्यास र हवाई फायर गरेका थिए। तर, उनीहरू रोकिएनन्। र, राष्ट्रपति निवास कब्जामा लिएरै छाडे।
पूर्वक्रिकेटर सनथ जयसुर्या पनि कोलम्बोमा सरकारविरोधी प्रदर्शनमा सहभागी भएका छन्। उनी आफैंले प्रदर्शनकारीहरूसँग खिचेका तस्बिर ट्विट गरेका छन्।
ठूलो संख्याका प्रदर्शनकारी स्थानीय क्रिकेट स्टेडियमको बाहिरपट्टि भेला भएका छन्। उक्त स्टेडियममा श्रीलंका र अस्ट्रेलियाबीच टेस्ट म्याच भइरहेको थियो।
