वेलिङ्टन- ओसेनिया मुलुक न्युजिल्यान्डले विश्वमै पहिलो घटनाका रूपमा पुरुष र महिला क्रिकेटर दुवैलाई बराबर भत्ता दिने निर्णय लिएको छ।
कुनै प्रतियोगितामा सहभागी भएवापत महिला–पुरुष दुवै खेलाडीले बराबरी भत्ता पाउने भएका हुन्। अहिलेसम्म कुनै मुलुकले महिला–पुरुषलाई बराबरी भत्ता दिएका छैनन्।
उक्त निर्णय न्युजिल्यान्डका लागि अन्तर्राष्ट्रिय प्रतियोगिता तथा घरेलु प्रतिस्पर्धा दुवैमा लागू हुने सरकारले बताएको छ।
न्युजिल्यान्ड क्रिकेट बोर्ड र खेलाडीहरूबीच पाँच वर्षका लागि त्यससम्बन्धी सम्झौता भएको छ। र, उक्त सम्झौतालाई ऐतिहासिक संज्ञा दिइएको छ।
एक दिवसीय, टेस्ट क्रिकेट र टी-२० सबै प्रकारका फर्म्याटमा यो नियम लागू हुने भएको छ। न्युजिल्यान्ड क्रिकेट बोर्डले महिला खेलाडीको संख्या पनि बढाउने निर्णय गरेको छ।
बोर्डका अनुसार राष्ट्रिय टिमका खेलाडीहरूलाई एक लाख ४२ हजार ३४६ देखि एक लाख ६३ हजार २४६ न्युजिल्यान्ड डलरसम्म दिइने छ। र, घरेलु क्रिकेट खेलाडीलाई १८ हजार १४६ देखि १९ हजार १४६ न्युजिल्यान्ड डलरसम्म दिइने भएको छ।
