काठमाडौं- सरकारले विवाह गर्ने प्रचलित कानूनको व्यवस्था संशोधन गर्ने तयारी थालेको छ।
कानून, न्याय तथा संसदीय मामिला मन्त्री गोविन्द बन्दीले बुधबार प्रतिनिधिसभामा त्यसबारे जानकारी दिएका हुन्।
कांग्रेस सांसद पुष्पा भुसालको प्रश्नको जवाफ दिँदै मन्त्री बन्दीले हाल विवाह गर्न योग्य उमेर २० वर्ष तोकिँदा अपराध बढेको देखिएकाले कानून संशोधन गर्न लागिएको जानकारी दिए।
२० वर्षपछि मात्र विवाह गर्न पाइने कानूनी व्यवस्थाका कारण बालबालिकामाथि विभिन्न प्रकारका हिंसाका घटना भइरहेको सांसद भुसालले बताएकी थिइन्। र, कानून संशोधन गरेर विवाह गर्न पाइने उमेर १८ वर्ष कायम गर्नुपर्ने माग गरेकी थिइन्।
उनको प्रश्नको जवाफ दिँदै मन्त्री बन्दीले विवाह गर्ने उमेर संशोधन प्रक्रिया अघि बढेको बताए। उक्त कानूनी व्यवस्था अव्यावहारिक भएको उनले बताए।
‘१६ वर्षमा नागरिकता पाइन्छ, १८ वर्षमा भोट दिन पाइन्छ। बिहे गर्न २० वर्षसम्म कुर्नुपर्छ, यो व्यावहारिक भएन,’ उनले भने, ‘यो अवस्था कुनै पनि स्ट्यान्डर्डसँग मेल खाँदैन। यसले अपराध बढाउने काम भइरहेको छ। बाल विवाहमा सजाय भइरहेको छ। त्यसैले यसमा रिभ्यु गर्नुपर्छ र कानून मन्त्रालयले रिभ्युको प्रक्रिया थालिसकेको छ।’