काठमाडौँ । अज्ञात रोगले खोरमै बङ्गुर मर्न थालेपछि मेचीनगर नगरपालिका ६ का भक्तबहादुर राई चिन्तित बनेका छन् ।

एक हप्ताको अन्तरालमा उनले पालेका ५८ उन्नत जातका बङ्गुर मरिसकेका छन् । स्माट एग्रो फर्म नामक संस्था दर्ता गरेर विगत दुई वर्षदेखि किसान राईले ४७ लाखको लागतमा मेचीनगर ८ स्थित मंगलचोकमा बङ्गुर पाल्नु सुरु गरेका थिए ।

फार्ममा रहेका ९४ विभिन्न प्रजातिका बङ्गुरमध्ये ५८ अज्ञात रोगले मरेका छन् । उनले भने, ‘बाँकी बङ्गुरलाई कसरी जोगाउने भन्ने चिन्ता थपिएको छ ।’

ल्याण्डप, पाख्रीबास, डिउरो, होल्याण जस्ता उन्नत जातका बङ्गुरपालन गरेका राईको खोरमै दैनिक छ देखि सात वटासम्म १३० केजीसम्मका बङ्गुर मर्न थालेपछि उनलाई बाँकी रहेका बङ्गुर जोगाउन मुस्किल परिरहेको छ ।

‘हप्तादिनको अवधिमा ५० किलोदेखि १३० किलोसम्मका बङ्गुर मरे,’ उनले भने, ‘पाठापाठीको त हिसाबै राखेका छैनन्, मरेकामध्ये पाँच ठूला बङ्गुरको मात्र इन्स्योरेन्स गरेको थिएँ ।’ बङ्गुरमा छेरौटी, उच्च ज्वरो, आहारा नखाने र झोक्राएर बस्नेजस्ता लक्षण देखिएको उनको भनाइ छ ।

नगरपालिकाको पशुसेवा विभाग प्रमुख पशु प्राविधिक छत्रबहादुर राईले रोगको पहिचानका लागि जिल्लाको समन्वयमा प्रयोगशाला परीक्षणका लागि पठाउने तयारी भइरहेको बताए ।