अस्ट्रेलियाका वैज्ञानिकहरूले प्लास्टिक खाने किरा पत्ता लगाएका छन्। उक्त किरामार्फत प्लास्टिक व्यवस्थापनमा ठूलो फड्को मार्न सकिने वैज्ञानिकहरूको आशा देखिएको छ।
‘सुपरवर्म’ नाम दिइएको जोफोबास मोरियो नामक खपटेकीराको लार्भा पोलिस्टाइरिन खाएर बाँच्न सक्ने वैज्ञानिकहरूले पत्ता लगाएका हुन्। उक्त लार्भाको पेटमा हुने विशेष प्रकारको पाचनरसले प्लास्टिक पचाउन सहयोग गर्ने पाइएको हो।
‘सुपरवर्म सानो पुनः प्रयोग कारखानाजस्तै हो। मुखले पोलिस्टाइरिन टुक्रा पार्ने र पेटमा भएका ब्याक्टेरियालाई खुवाउने,’ अध्ययनमा संलग्न डा. क्रिस रिन्कले भनेका छन्।
युनिभर्सिटी अफ क्विन्सल्यान्डका अनुसन्धानकर्ताले तीनवटा समूहमा राखिएका सुपरवर्मलाई तीन सातासम्म छुट्टाछुट्टै आहारा दिएका थिए। तीमध्ये पोलिस्टाइरिनको खाना दिइएका लार्भाको तौल बढेको पाइएको थियो।
र, त्यसपछि उनीहरूले सुपरवर्मको पेटमा पोलिस्टाइरिन र स्टाइरिन पनि गलाउन सक्ने धेरै पाचनरस भएको पत्ता लगाएका थिए।
ती किराको पाचनरसमार्फत प्लास्टिक रिसाइक्लिङका लागि जैविक रस उत्पादन गर्न सकिने विश्वास वैज्ञानिकहरूको छ। यसअघि पनि केही प्रजातिका खपटेकीराका लार्भाले पोलिस्टाइरिन खाने गरेको पाइएको थियो। र, यसअघि अन्य अनुसन्धानमा पनि प्लास्टिकलाई गलाउन सक्ने क्षमताका ब्याक्टेरिया र ढुसी पत्ता लागेका थिए।
बीबीसीबाट
