काठमाडौं- आज ३ नोभेम्बर। विश्व इतिहासका विभिन्न घटनाले आजको दिन स्मरण गराउँछन्। प्रस्तुत छ, तीमध्ये केही प्रमुख घटनाको सारसंक्षेप।
– सन् १८६८- अमेरिकी संसदमा प्रथम अश्वेत नेता निर्वाचित
सन् १८६८ मा आजकै दिन अमेरिकी संसदमा प्रथम अश्वेत नेता सांसद निर्वाचित भएका थिए। जोन विलिसले अफ्रिकी-अमेरिकी समुदायबाट पहिलो निर्वाचित सांसद बन्ने रेकर्ड राखेका थिए। उनी संसदको तल्लो सदन ‘हाउस अफ रिप्रिजेन्टेटिभ’मा निर्वाचित भएका थिए।
– सन् १९७३- नासाले प्रक्षेपण गर्यो ‘मरिनर १०’
अमेरिकी अन्तरिक्ष एजेन्सी नासाले आजकै दिन ‘मरिनर १०’ नामक अन्तरिक्ष यान प्रक्षेपण गरेको थियो। यो मरिनर कार्यक्रमको अन्तिम हिस्सा थियो। ‘मरिनर १०’ शुक्र र बुध ग्रह समिपमा उडान भर्ने पहिलो अन्तरिक्ष यान थियो। उक्त यानले ५ फेब्रुअरी १९७४ मा शुक्र ग्रहको समिपमा उडान भरेको थियो। यस्तै, २९ मार्च १९७४, २१ सेप्टेम्बर १९७४ र १६ मार्च १९७५ गरी तीनपटक बुध ग्रहको नजिकमा उडान गरेको थियो। त्यसपछि उक्त यानसँग धर्तिको सम्पर्क विच्छेद भयो।
– सन् १९७८- डोमिनिकालाई स्वतन्त्रता
क्यारिबियन टापु मुलुक डोमिनिका आजकै दिन स्वतन्त्र भएको थियो। उक्त मुलुक सन् १८०५ मा ब्रिटिस पञ्जामा परेको थियो। आजकै दिनदेखि उक्त मुलुक ब्रिटिस पञ्जाबाट मुक्त भएको हो।
– सन् १९९८- ग्रेटवालको अज्ञात खण्डको खोजी
चीनको विशाल पर्खाल ग्रेटवालको अर्को खण्डको खोजी आजकै दिन सम्पन्न भएको थियो। निङ्जियाको हुई स्वायत्त क्षेत्रमा पर्ने उक्त खण्डको बारेमा त्यतिन्जेल ठोस प्रमाण प्राप्त भइसकेको थिएन। करिब २५ किलोमिटर लामो उक्त खण्डको उत्खनन् आजकै दिन सम्पन्न भएको थियो। चीनको ग्रेटवाल करिब ७ हजार ३०० किलोमिटर लामो छ।
– सन् २०२०- तुफान ‘इटा’ले लियो २५३ को ज्यान
सन् २०२० मा उत्तर, मध्य र दक्षिण अमेरिकामा ‘इटा’ नाम दिइएको समुद्री तुफानले विनाशलीला मच्चाएको थियो। निकारागुवा, ग्वाटेमाला, होन्डुरस, मेक्सिकोमा गरी २५३ जनाको ज्यान गएको थियो।
– सन् २०२२- इमरान खानमाथि प्राणघातक हमला
सन् २०२२ मा आजकै दिन पाकिस्तानका पूर्व प्रधानमन्त्री इमरान खानमाथि प्राणघातक आक्रमण भएको थियो। वजिरावाद नामक स्थानमा र्यालीका दौरान उनीमाथि गोली प्रहार गरिएको थियो। तर, गोली उनको खुट्टामा मात्र लागेको थियो।
– सन् २०२३- नेपाल भूकम्पमा गयो १५७ को ज्यान
सन् २०२३ मा आजकै दिन नेपालको जाजरकोटमा गएको भूकम्पमा परी १५७ जनाको ज्यान गएको थियो। ५.६ रेक्टर स्केलको भूकम्पले दुर्गम पहाडी क्षेत्रमा बढी क्षति पुर्याएको थियो। हजारौं स्थानीय बासिन्दा घरबारविहीन भएका थिए।
– सन् २०२४- स्पेनी राजामाथि नागरिकको हिलो प्रहार
सन् २०२४ मा स्पेनका राजा फिलिप छैटौं र प्रधानमन्त्री पेड्रो सान्चेजमाथि आक्रोसित नागरिकले हिलो प्रहार गरेको घटनाले विश्वव्यापी चर्चा पाएको थियो। बाढी प्रभावित भ्यालेन्सिया क्षेत्रमा ढिलो गरी उद्धार र राहत अभियान चलाएकामा आक्रोसित नागरिकले हिलो प्रहार गरेका हुन्। पाइपोर्टा शहरका आक्रोसित बासिन्दाले उनीहरू सहित सरकारी अधिकारीहरूलाई दुर्व्यवहार गरेका थिए।