कैलाली । धनगढी उपमहानगरपालिकाले बेहडाबाबा मन्दिर जाने बाटोमा पर्ने शिवगंगा नदीमा अस्थायी बाटो निर्माण गर्ने नाममा वर्षेनि नदीजन्य पदार्थ उत्खनन गर्दै आएको आरोप लागेको छ। तर, बिडम्बना यस बारेमा स्थानिय भने बोल्न डराउछन, के पो भैहाल्ने हो भनेर ।
नदीमा ह्युमपाइप राखेर बनाइने अस्थायी बाटोका लागि आवश्यक ग्राभेल अन्यत्रबाट व्यवस्थापन गर्न सकिने भए पनि त्यही नदीको धार खोतलेर ग्राभेल निकाल्ने र बाटोमा हाल्ने काम दोहोरिँदै आएको स्थानीयको भनाइ छ। वर्षायाममा बाढी आएपछि उक्त अस्थायी संरचना बगाउने र अर्को वर्ष पुनः खोलामै पसेर ग्राभेल निकाल्ने क्रमले अस्थायी बाटो निर्माणको नाममा नदी दोहनको चक्र नै चलिरहेको प्रश्न उठेको छ।
धनगढी उपमहानगरपालिकाले आवश्यक वातावरणीय प्रक्रिया पूरा नगरेका कारण अहिलेसम्म नदीजन्य पदार्थ उत्खननको ठेक्का समेत हुन नसकेको बताइन्छ। यस्तो अवस्थामा ठेक्का प्रक्रिया नै अघि बढ्न नसकेको नदीबाट उपमहानगरले अस्थायी बाटोका नाममा आफैं नदी खोतल्न मिल्छ कि मिल्दैन? भन्ने प्रश्न उठेको छ।
बाटो निर्माणले स्थानीय र मन्दिर जाने यात्रुलाई तत्काल सहजता दिए पनि त्यसको दीर्घकालीन वातावरणीय तथा नदीजन्य जोखिमबारे भने पर्याप्त ध्यान नदिइएको देखिन्छ। छेवैमा वर्षेनि कटानमा पर्दै आएको जमिन छ । जहा स्थानिय थुप्रै जमिन नदिले कटान समेत गर्दै आएको छ ।
विकास निर्माणका नाममा कानुनी प्रक्रिया मिच्ने छुट स्थानीय सरकारलाई पनि हुन्छ कि हुँदैन?