कञ्चनपुर । महाकाली नदीमा पानीको बहाव बढेपछि पश्चिम नेपालबाट भारततर्फ जाने गड्डाचौकी नाका हुँदै शारदा ब्यारेज पुलमा आवागमन बन्द गरिएको छ।
महाकाली नदीमा पानीको सतह १ लाख ३० हजार क्युसेक पुगेपछि सुरक्षालाई ध्यानमा राख्दै शारदा ब्यारेजमा आवागमन रोकिएको हो। पहाडी क्षेत्रमा लगातार वर्षा भइरहेको र नदीको बहाव अझै बढ्न सक्ने सम्भावना रहेकाले सीमा क्षेत्रमा थप सतर्कता अपनाइएको छ।
पानीको बहाव बढेसँगै कञ्चनपुरका नदी तथा खोलानाला आसपासका बस्तीमा समेत जोखिम बढ्न सक्ने भन्दै जिल्ला प्रशासन कार्यालय कञ्चनपुरले नदी तटीय क्षेत्रका बासिन्दालाई उच्च सतर्कता अपनाउन अपिल गरेको छ।
प्रशासनले नदी तथा खोलाको किनारमा नजान, जोखिमयुक्त स्थानमा बसोबास गर्ने परिवारले आवश्यक सावधानी अपनाउन तथा सम्भावित बाढी र डुबानको अवस्थालाई ध्यानमा राखी सुरक्षित स्थानतर्फ जानका लागि पूर्वतयारी अवस्थामा रहन आग्रह गरेको छ।
महाकाली नदीको जलस्तरमा निरन्तर निगरानी भइरहेको जनाउँदै प्रशासनले विपद्को अवस्था सिर्जना भएमा स्थानीय प्रशासन, सुरक्षा निकाय तथा सम्बन्धित निकायको निर्देशन पालना गर्न समेत आग्रह गरेको छ।
कञ्चनपुरमा महाकालीसहित विभिन्न नदी तथा खोलामा पानीको बहाव बढ्न सक्ने भएकाले विशेषगरी नदी तटीय क्षेत्रका बासिन्दालाई रातिको समयमा समेत थप सावधानी अपनाउन आग्रह गरिएको छ।
बाढी तथा डुबानको जोखिमलाई मध्यनजर गर्दै स्थानीय तह, सुरक्षा निकाय र विपद् व्यवस्थापनसँग सम्बन्धित निकायलाई समेत तयारी अवस्थामा रहन भनिएको छ। कञ्चनपुरको गड्डाचौकी–शारदा ब्यारेज क्षेत्रमा आवागमन बन्द भएपछि नेपाल–भारत सीमा हुँदै हुने आवतजावतमा समेत अस्थायी प्रभाव परेको छ।
कञ्चनपुरमा बाढीको पूर्वसूचना तथा विपद् व्यवस्थापनका लागि जिल्ला प्रशासन कार्यालयअन्तर्गत आपत्कालीन संयन्त्र रहेको छ।
