काठमाडौँ । श्रीलंकामा प्रधानमन्त्रीको सरकारी निवास ‘टेम्पल ट्री’मा आगजनी भएको छ । प्रदर्शनकारीले प्रधानमन्त्री निवासको मुख्य गेट तोडेर पार्क गरिएको ट्रकमा आगजनी गरेका थिए ।
ट्रकमा आगजनी भएसँगै प्रदर्शनकारीले प्रधानमन्त्रीको निवासभित्र गोली चलाइएका थिए । आन्दोलित भिडलाई नियन्त्रण गर्न प्रहरीले अश्रुग्यास प्रहार गर्नुका साथै हवाई फायर गरेको थियो ।
यस्तै, प्रदर्शनकारीले राष्ट्रपति गोटाबाया राजपक्षे र निवर्तमान प्रधानमन्त्री महिन्दा राजापाक्षेको जन्म घरमा समेत आगजनी गरिदिएका छन् । समाचार एजेन्सी एएफपीका अनुसार सोमबार हजारौँ प्रदर्शनकारीले उनको निवासमा आगजनी गरेका हुन् । प्रदर्शनमा हालसम्म १२ भन्दा बढी मन्त्रीको घर जलाइएको छ ।
सोमबार मात्रै विपक्षी दलको दबाबमा प्रधानमन्त्री महिन्दाले पदबाट राजीनामा दिएका थिए । उनको राजीनामाबाट असन्तुष्ट समर्थकले राजधानी कोलम्बोमा हिंसात्मक घटना गरेका थिए । त्यसपछि उनका विपक्षी पनि आक्रोशित भएका थिए ।
प्रदर्शनकारीले राजधानी कोलम्बोमा पूर्वमन्त्री जोन्सन फर्नान्डोलाई कारसहित तालमा फालिदिएका थिए ।
