फेसबुकको सञ्चालक ‘मेटा’ले प्रत्येक वर्ष शीर्ष कार्यकारी मार्क जुकरवर्ग र प्रमुख अपरेटिङ अफिसर शेरिल स्याण्डवर्ग दुवैको सुरक्षामा करोडौँ डलर खर्च गर्छ । वर्षेनी कम्पनीले आफ्ना दुई प्रमुखको सुरक्षामा भएको खर्च सार्वजनिक गर्छ ।
यसै परम्पराअनुसार कम्पनीले सन् २०२१ मा जुकरवर्ग र स्याण्डवर्गको सुरक्षाका लागि खर्च भएको रकम सार्वजनिक गरेको छ । कम्पनीका अनुसार सन् २०२१ मा जुकरवर्गको सुरक्षामा दुई करोड ६८ लाख डलर (डलरको मूल्यअनुसार तीन अर्ब २६ करोड ९६ लाख रुपैयाँ) खर्च भयो । जुन अघिल्लो वर्षको तुलनामा करिब ६ प्रतिशतले बढी हो ।
कम्पनीका अनुसार २०२१ मा बढ्दो निजी यात्रा कोभिड १९ बाट बच्न अपनाइका सुरक्षा प्रोटोकलसँग सम्बन्धित खर्च र सुरक्षाका लागि तैनाथ सुरक्षकर्मीको बजार मूल्य बढेकाले जुकरवर्गको सुरक्षा खर्च बढेको स्पष्टीकरण दिएको छ ।
जुकरवर्गको सुरक्षा खर्चअन्तर्गत कम्पनीले व्यक्तिगत सुरक्षा, निवासको सुरक्षा र उनको यात्राको क्रममा हुने सुरक्षा प्रबन्धहरू पर्छन् । यसका लागि कम्पनीले निश्चित सुरक्षा प्रबन्धको खरिद, स्थापना र मर्मत सम्भारसहितको भुक्तानी गर्दछ ।
सन् २०२१ मा जुकरवर्गको सुरक्षामा भएको खर्च अन्य अमेरिकी धनाढ्यको सुरक्षामा भएको खर्चभन्दा उच्च देखिन्छ । जस्तो अमेजन डट कमका मालिक जेफ बेजोसको सुरक्षामा गत वर्ष १६ लाख डलर मात्र खर्च भएको कम्पनीले सार्वजनिक गरेको तथ्याकमा देखिन्छ ।
मेटाले जुकरवर्गका अतिरिक्त चिफ अपरेटिङ अफिसर शेरिल स्याण्डवर्गको सुरक्षामा ९० लाख डलर खर्च गरेको छ । यसमा स्याण्डवर्गले व्यक्तिगत यात्राका लागि प्रयोग गर्ने निजी वायुयानको २३ लाख डलर जोडिएको छैन ।
सन् २०२२ बाट फेसबुकको सञ्चालक मेटाले जुकरवर्गले उनको निजी बाहनबाट गर्ने व्यक्तिगत यात्राको खर्च पनि बेहोर्न शुरु गर्ने बताइएको छ ।
सुरक्षामा उच्च खर्च भए पनि जुकरबर्गले तलब भने वर्षभरिमा जम्मा एक डलर मात्र लिन्छन् । त्यसबाहेक उनले सबै बोनस योजना पनि परित्याग गरेका छन् । जुकरवर्गको सम्पतिको अधिकांश हिस्सा मेटाको शेयरसँग जोडिएको छ ।
