पूर्व हेभिवेट बक्सर माइक टाइसनले उनी चढेको जहाजको छेउमा बसेका यात्रुलाई पिटेको भिडियो सार्वजनिक भएको छ । उनका प्रवक्ताले ‘सहयात्रीले टाइसनलाई पानीको बोत्तलले हानेपछि आक्रोसित भएको’ बताएका छन् ।

जहाजका अन्य यात्रुले मोबाइलबाट खिचेको भिडियोमा टाइसन उठेर अर्को यात्रुमाथि लगातार पञ्च हानिरहेको देखिन्छ । बक्सिङ ‘हल अफ फेमर’का प्रवक्ताले पनि टाइसनले ‘अपमानित गर्ने’ एक जना ‘उग्र यात्रु’लाई पञ्च हानेको पुष्टि गरे ।

घटनापछि सन फ्रान्सिस्को अन्तर्राष्ट्रिय विमानस्थलभित्रको अस्पतालमा सामान्य चोटपटकका लागि उपचार गरिएको र घटनामा संलग्न दुवैलाई प्रहरीको जिम्मा लगाइएको विमानस्थल प्रशासनले जनाएको छ । प्रहरीले दुवैलाई केही समय हिरासतमा राखेको जानकारी दिएको छ ।

प्रहरीले दुर्ई जनाको पहिचान टिपेर थप अनुसन्धानमा सघाउने प्रतिबद्धता गराएर छाडेको बताएको छ । घटना बुधबर राति जेट–ब्लु वायुसेवाको विमानमा भएको थियो ।

सान फ्रान्सिस्कोदेखि फ्लोरिडा उड्न लागेको विमान उड्नुअघि दुई जनाबीच भनाभन भएको र टाइसनले सहयात्रीलाई पिटेका विमानमा रहेका अन्य यात्रुले बताए ।

विमानभित्र टाइसनले सहयात्रुलाई पञ्च हानेको भिडियो पहिलो टक टीएमजेड नामक ट्याबलोइडले प्रकाशित गरेको थियो । टीएमजेडका अनुसार सुरुमा ती सहयात्रीसँग तस्वीर खिचाउन माइक तयार भएका थिए । तर, ती व्यक्तिले उनको अपमान गर्न थाले । माइकले पटक पटक शान्त रहन आग्रह गर्दा पनि तिनले अपमान गरिरहेका थिए ।

टाइसन संलग्न मारपिट र हिंसाका घटना विगतमा पनि पटक पटक सार्वजनिक भएका छन् । सन् १९९२ मा उनी बलात्कारको आरोपमा दोषी पाइएका थिए । त्यस घटनामा उनलाई तीन वर्षको जेल सजाय भयो ।

पुनः सन् १९९७ मा उनले बक्सिङ रिङमा प्रतिद्वन्दीको कानको एक अंश नै चोइटिने गरी टोकिदिएका थिए । त्यस समय उक्त खेल नै रद्द गर्नु परेको थियो । सन् १९९८ मा म्यारिल्याण्डमा भएको उन संलग्न कार दुर्घटनामा उनको गल्ती पाइएको थियो ।

सन् २०२१ फेब्रुअरीयता अमेरिकाभर विमानभित्र गर्न नहुने व्यवहार गरेको अवस्थामा सात हजार यात्रु समातिएका संघीय उड्यन प्रशासनले बताएको छ । तीमध्ये ७० प्रतिशत मास्क लगाउने नमानेहरु रहेको प्रशासनले जानकारी दिएको छ ।