काठमाडौँ । रुसले युक्रेनको पूर्वी डोनवास क्षेत्रका अतिरिक्त सम्पूर्ण दक्षिण युक्रेन सधैका लागि कब्जा गर्ने लक्ष्य लिएको एक वरिष्ठ रुसी कमाण्डरले बताएका छन् । रुसका सरकारी मिडियाहरूले सेनाका मेजर जनरल रुस्तम मिन्नेकायभको भनाइलाई महत्व दिएर प्रकाशित गरेका छन् ।
जनरल मिन्नेकायभले यो लक्ष्य हासिल गर्न सकेमा सन् २०१४ मा रुसले कब्जा गरेको क्राइमिया प्रायद्विप जमिनबाटै रुससँग जोडिने बताएका छन् । क्राइमिया र रुस समुन्द्रले छुट्टिएको छ । सन् २०१८ मा दुई भूमिलाई जोड्न समून्द्रमा बनाइएको १९ किलोमिटर पुल उद्घाटन गरिएको थियो ।
जनरल मिन्नेकायभले सम्पूर्ण दक्षिण भेग कब्जामा लिएपछि माल्डोभाबाट छुट्टिएको घोषणा गरेको रुस समर्थित राज्य ट्रान्सनिस्ट्रिया पनि भूमिबाटै जोडिने बताए ।
जनरल मिन्नेकायभको कुरा रुसी राष्ट्रपति कार्यालय क्रेमलिनकै आधिकारिक भनाइ भएको पुष्टि त भइसकेको छैन । तथापि, उनको भनाइलाई सबै जसो रुसी मिडियाले जोड दिएर प्रकाशित गरेका छन् । यस विषयमा रुसी रक्षा मन्त्रालयसँग आफूहरूले प्रतिक्रिया माग्दा जनरलको टिप्पणीबारेमा अध्ययन गरिरहेको जवाफ आएको छ ।
यदि, मेजर जनरल मिन्नेकायभको भनाइ पुष्टि भएमा यसले रुसले युक्रेन युद्धमा चाहेको लक्ष्य प्रष्ट्याउने छ । रुसले हालसम्म युक्रेन युद्धबाट के चाहेको भन्ने ठोस लक्ष्य बताएको छैन । रुसले पछिल्लो समय उसका सेनालाई पूर्वी युक्रेनमा केन्द्रीत गर्दै लगेको छ । आगामी केही साता युक्रेन र रुसबीचको युद्ध निर्णाक हुने विश्लेषकहरूले बताएका छन् ।
जनरल मिन्नेकायभ रुसको केन्द्रीय सैन्य क्षेत्रका सहायक कमाण्डरको जिम्मेवारीमा छन् । चर्चामा आएको भनाइ उनले शुक्रबार स्भेर्डलोभ्स्को एक सैन्य कार्यक्रममा सम्बोधन गर्ने क्रममा भनेका थिए ।
युक्रेनको रक्षा मन्त्रालयले जनरल मिन्नेकायभको भनाइलाई रुसी ‘साम्राज्यवाद’को संज्ञा दिए । राष्ट्रपति जेलेन्स्कीले उनको नियमत रात्रि कालीन सम्बोधनमा यो विषय पनि उठाए । ‘कमाण्डरको भनाइले युक्रेनमाथिको रुसी अतिक्रमण सुरुवात मात्र थियो, उनीहरू अन्य देश पनि कब्जा गर्न चाहन्छन् भन्ने देखाएको,’ जेलेन्स्कीले दाबी गरे ।
जेलेन्स्कीले यसअघि रुसले कब्जा गरेका क्षेत्रमा जनमत संग्रह आयोजना गर्ने योजना बनाएको बताएका थिए । युक्रेनी रक्षा मन्त्रीका प्रवक्ताले पनि खरसन र जपोरिज्झिया वरपर क्षेत्रका नियन्त्रित भूमिमा आगामी साता जनमत संग्रह गराउन लागिएको बताए ।
बीबीसीबाट
