लण्डन । म्यान्चेस्टर युनाइटेडका स्टार खेलाडी क्रिष्टियानो रोनाल्डोकी प्रेमिका जर्जियाना रोद्रिगेजले जुम्ल्याहा बच्चालाई जन्म दिएकी छन् । छोरा र छोरी जुम्ल्याहा बच्चा रहेकोमा छोराको भने जन्मपछि मृत्यु भएको रोनाल्डो आफैले बताएका छन् ।

जुम्लाहामध्ये छोरीको स्वास्थ्य अवस्था ठिक रहेको छ । त्यसले आफूलाई दुःखद घडीमा आडभरोसा दिएको रोनाल्डोले बताएका छन् ।

सोमबर आफ्नो इन्स्टाग्रामा पोष्ट गर्दै रोनाल्डोले लेखेका छन्, ‘हामीहरू गहिरो दुःख र भारी मनका साथ हाम्रो शिशु छोरा बितेको घोषणा गर्नु परेको छ, यो कुनै अभिभावकका लागि सबैभन्दा ठूलो पीडाको अनुभूति हो, हाम्री शिशु छोरीको जन्मले भने हामीलाई यो दुःखद घडीमा आसा र खुसी दिएको छ ।’

‘हामीहरू डक्टर र नर्सलाई तिनको सक्षम सेवा र सहयोगका लागि धन्यवाद दिन चाहन्छौँ, यो अपुरणीय क्षतिबाट हामी सबै भावविह्वल छौँ र यो कठिन समयमा हाम्रो गोपनीयताको सम्मान गरिदिन सबैमा विनम्रतापूर्वक आग्रह गर्दछौ,’ रोनाल्डोले भने ।

रोनाल्डोले अक्टोबरमा उनी र रोद्रिगेजले जुल्याहा बच्चा पाउन लागेको खबर दिएका थिए । दुई जोडीको पहिले नै चार बच्चा छन्, जसमध्ये दुई जना जुम्ल्याहा हुन् ।

रोनाल्डोको वियोगप्रति सहानुभूति व्यक्त गर्दै उनी आबद्ध क्लब म्यानचेस्टर युनाइटेडले ट्वीटर लेखेको छ, ‘तिम्रो पीडा हाम्रो पीडा हो, क्रिष्टियानो, यो समयमा तिमी र तिम्रो परिवारलाई माया र साहस प्राप्त होस् ।’

गत अगष्टमा रोनाल्डो उनको पुरानो टिम म्यान्चेस्टर युनाइटेड फर्किएका थिए । यसअघि सन् २००३ देखि २००९ मा उनी सो क्लबमा आबद्ध थिए । द गार्जियनबाट