स्टकहोम । स्वीडेनमा उग्र दक्षिणपन्थी तथा आप्रवासी विरोधी समूहहरूद्वारा मुस्लिमको पवित्र ग्रन्थ कुरान जलाएको विषयमा कयौं शहरमा झडप भइरहेका छन् ।
स्थानीय मिडियाका अनुसार मुस्लिमहरूको पवित्र ग्रन्थ कुरान जलाएपछि उत्पन्न तनावका कारण पूर्वी सहर नोर्शापिङमा आइतबार दंगाग्रस्त रह्यो । प्रहरीले दंगाकारीलाई तितरवितर गराउन गोली चलाउनु परेको थियो । उक्त घटनाबाट तीन घाइते भएका छन् ।
कैयौँ सवारी साधनमा आगजनी गरिएको दंगामा संलग्न १७ जना पक्राउ परेका छन् । शनिबार, दक्षिणी सहर माल्मामा उग्र दक्षिणपन्थीहरूले निकालेको ¥यालीको दौरान हिंसा भड्किएपछि कैयौँ साना सवारी साधनसहित एक बसमा आगजनी गरिएको छ ।
कुरान जलाउने कार्यमा संलग्न डेनिस–स्वीडिश उग्रवादी रासमुस पालुदानले आफूले इस्लामको सबैभन्दा पवित्र ग्रन्थ जलाएको र यो काम पुनः दोहोर्याउने बताए ।
अति दक्षिणपन्थी समूहले बिहीबार, शुक्रबार र शनिबार जुन स्थानमा कार्यक्रम आयोजना गरे, त्यहाँ झडप भएको थियो । झडपमा कम्तीमा १६ प्रहरी अधिकारी घाइते भएका थिए । धेरै प्रहरी गाडीमा क्षति पुगेको थियो ।
झडपका घटनाहरू स्टकहोमको उपनगर, लिनसेपिङ र नोरसेपिङजस्ता शहरमा भएका छन् । पालुदानले आइतबार नोरेसेपिङमा अर्को ¥याली गर्ने चेतावनी दिएको ड्युचे वेलेले समाचार लेखेको छ । सो कार्यक्रमको विरोध गर्न मानिसहरू पहिले भेला भएका थिए ।
स्थानीय प्रहरीले आफ्नो विज्ञप्तिमा बताएअनुसार आक्रमणको धम्कीपछि चेतावनी स्वरूप गोली चलाएको र यस क्रममा तीन जना घाइते भएका थिए ।
साउदी अरब र इरानको विरोध
स्वीडेनमा भएको घटनाको साउदी अरबले विरोध जनाएको छ । उसको विदेश मन्त्रालयले एक विज्ञप्ति जारी गर्दै परराष्ट्र मन्त्रालयले पवित्र कुरान र मुस्लिम समुदायको जानाजानी गरिएको अपमानका लागि साउदी अरेबियाको निन्दालाई रेकर्ड गरेको बताएको छ ।
सोही विज्ञप्तिमा अगाडि भनिएको छ, ‘साउदी अरब संवाद, सहिष्णुता, सह–अस्तित्व प्रवद्र्धनको प्रयासको महत्वलाई जोड दिन्छ । साथै घृणा, उग्रवाद र सबै धर्म तथा पवित्र स्थलको दुरुपयोगको परित्यागलाई समर्थन गर्ने बताएको छ ।’
कुरान जलाउने कार्य र त्यसपछि भएको प्रदर्शनलाई लिएर इरान र इराक सरकारले त्यहाँका कूटनीतिज्ञलाई बोलाएको थियो ।
