साउदीमा अलपत्र २ सय भन्दा बढी नेपाली उद्धारको पर्खाइमा रहेका छन् । विभिन्न समयमा साउदी अरब पुगेका पीडितहरू सम्झौता अनुसारको काम र तलब नपाउँदा अलपत्र परेका हुन् ।
काठमाडौँको सिनामंगलस्थित ब्लु ग्यालेक्सी ओभरसीज प्रालीमार्फत विगत दुई महिनाअघि गएका १ सय ३० नेपाली युवा उद्धारको पर्खाइमा रहेको र आफूसहित ५ जनालाई जेद्धामा लगेर अलपत्र पारेको शेख नुरमहमदले बताए ।
ब्लु ग्यालेक्सीका सञ्चालक हिमहरी अर्याल उनीहरूको समस्या समाधान गर्नको लागि साउदी पुगेको भए पनि अहिलेसम्म कुनै पहल नगरेको गुनासो गरे। म्यानपावरका सञ्चालकले जेद्धा आउने भनेको तर सम्पर्क गर्दा फोन नउठाउने गरेको उनले सुनाए । भोक भोकै अर्काको कोठामा शरण लिएको पनि जनाए।
काठमाडौँको चक्रपथमा रहेको नासा ह्युमन रिसोर्स प्रालि र बसुन्धरामा रहेको बिगेस फोरेग्न इम्पोईमेन्ट प्रालिमार्फत साउदीमा रहेको अल बादर इन्टरनेशनल ओपेरेशन एंड मेनटीनेन्स कम्पनीमा होटेलको काममा भनेर पठाइएका ४० भन्दा बढी नेपाली युवा पनि उद्धारको पर्खाइमा छन् ।
म्यानपावरलाई प्रति व्यक्ती १ लाख ५० हजारदेखि १ लाख ७५ हजारसम्म बुझाएर साउदी पुगेका उनीहरूलाई कम्पनीले तीन महिनादेखि काम नदिएपछि कोठामै अलपत्र परेको पीडित हिरालाल स्याङ्तानले बताए ।
काठमाडौँको गैरीधारास्थित एचआर इन्टरनेशनल इम्पोईमेन्ट सेर्विसमार्फत साउदीमा रहेको फाक्ट्री नुरह मुसफिर बिन हुसयन अल फिथ फर मेनुफाक्चरिङ्ग कम्पनी र दूध फाक्ट्री काममा भनेर पठाइएका अरू २९ जना भन्दा धेरै नेपाली युवा पनि म्यानपावर कम्पनीले भने अनुसारको काम दिलाउन नसक्दा अलपत्र परेका छन् ।
म्यानपावरले पटक-पटक काम दिलाई दिने भन्दै झुक्काउने गरेको उनीहरूको भनाइ छ । म्यानपावरका सञ्चालक नरेश गेलालले भने ठुलो सुपर मार्केटमा काम लगाउने तयारी भइरहेको र चाँडै समस्या समाधान हुने आश्वासन दिए। उनीहरूलाई काम लगाउनेबारे दूतावास र कम्पनीसँग समन्वय भइरहेको र रामदानका कारण केही ढिलाइ भएको बताए ।
