केही दिनयता काठमाडौंको वायुमण्डलमा देखिएको तुवाँलो विस्तारै हटिरहेको देखिन्छ।

त्यही तुवाँलोका कारण कचौराजस्तो काठमाडौंमा केही दिनदेखि वायु प्रदूषण अत्यधिक बढेको थियो। गत शुक्रबार प्रदूषणको तह उच्च हुँदा काठमाडौंमा विश्वका प्रदूषित शहरको सूचीमा पाँचौँमा उक्लिएको थियो।

घाम लागेर उज्यालो बनेको काठमाडौंको सतह मंगलबार विश्वको प्रदूषित शहरको सूचीमा १५ नम्बरमा झरेको छ। यो विश्वको वायु प्रदूषण मापन गर्ने ‘आईक्यूएयर’को तथ्यांक हो। उक्त तथ्यांक छिनछिनमा घटबढ भने भइरहन्छ।

मौसमविद्हरूका अनुसार काठमाडौंको वायुचक्र घामसँग जोडिएको छ। उपत्यकाको वायु चक्रअनुसार अपराह्नतिर धादिङ सीमाको मुड्कु भञ्ज्याङतर्फबाट उपत्यकामा तातो हावा प्रवेश गर्छ। यस्तै, चोभारको गल्छीबाट तराईको तातो हावा भित्रिन्छ। दुवैतिरबाट भित्रिएको हावा ग्वार्को आसपासको वायु मण्डलमा भेट हुन्छन्। र, उपत्यकाको तातो हावासहित पूर्वको साँगा भञ्ज्याङ हुँदै बाहिरिन्छिन्। उपत्यकाको तातो हावामा यहाँ जम्मा भएका प्रदूषित कण पनि मिसिएका हुन्छन्। र, साँझपख उपत्यकाको वातावरण केही हदसम्म स्वस्थ हुन्छ। तर, जब यो वायुचक्र अवरुद्ध हुन्छ, उपत्यकामा प्रदूषण अत्यधिक बढ्छ।