सत्तारुढ गठबन्धनमा आबद्ध दलहरूले मधेश प्रदेशमा चुनावी तालमेल गर्ने तयारी थालेका छन्।
आसन्न पालिका चुनावमा तालमेल गर्ने तयारीस्वरूप सत्तारूढ दलहरूको मधेश प्रदेशस्तरीय बैठक आइतबार बस्दैछ।
चुनावी तालमेलका विषयमा छलफल गर्न जनकपुरधामस्थित कांग्रेस प्रदेश कार्यालयमा बैठक बस्न लागेको जसपा मधेश प्रदेशका अध्यक्ष रामबाबु यादवले जानकारी दिए। बैठकमा सत्ता गठबन्धनमा आबद्ध जसपासहित कांग्रेस, माओवादी केन्द्र र एकीकृत समाजवादीका प्रदेश अध्यक्ष तथा केही शीर्षनेता सहभागी हुने अध्यक्ष यादवले बताए।
बैठकमा तालमेल कसरी गर्ने, कुन पालिकामा कुन पार्टीले उम्मेदवारी दिनेलगायत विषयमा छलफल हुने जनाइएको छ। ३० वैशाखमा हुने पालिका निर्वाचनमा गठबन्धन गर्ने निर्णय सत्ता गठबन्धनले गरिसकेको छ। सोही निर्णयका आधारमा मधेशमा गठबन्धनमा आबद्ध दलले छलफल अगाडि बढाएका हुन्। मधेशमा एक महानगरपालिकासहित १३६ स्थानीय तह छन्। राससबाट