काठमाडौँ । श्रीलंकामा आर्थिक संकट गहिरिएसँगै बिहीबार राष्ट्रपतिको निवासबाहिर हिंसात्मक प्रदर्शन भएको छ । प्रदर्शनपछि देशभर आपतकाल घोषणा गरिएको छ ।
प्रदर्शनकारीले राष्ट्रपति गोटाबाया राजापाक्षको निजी निवास नजिकै ब्यारिकेड र सवारी साधनमा आगजनी गरेका थिए। घटनापछि सेना परिचालन गरी वारेन्टविना शंकास्पदलाई पक्राउ गर्ने स्वतन्त्रता दिइएको छ ।
राष्ट्रपतिको निवासबाहिर शान्तिपूर्ण रूपमा सुरु भएको प्रदर्शनमाथि प्रहरीले अश्रुग्यास र पानीको फोहोरा प्रहार गरेसँगै उग्र रुप लिन पुगेको हो । जवाफमा प्रदर्शनकारीले प्रहरीमाथि ढुंगा प्रहार गरेका थिए ।
यसैबीच राष्ट्रपति राजापाक्षेले शुक्रबारदेखि देशभर संकटकाल घोषणा गरेका छन् । देशको सुरक्षा र अत्यावश्यक सेवाको आपूर्तिलाई व्यवस्थित गर्न संकटकालको घोषणा गर्नु परेको समाचारमा जनाइएको छ ।
राजापाक्षे सरकारलाई समर्थन गर्ने ११ दलले मन्त्रिपरिषद् विघटन गरी अन्तरिम सरकार गठन गर्न माग गरेका छन् ।
