रुसजस्तो शक्तिशाली मुलुकविरुद्ध युक्रेन कसरी युद्धमा निरन्तर टिकिरहेको छ भन्ने विषयमा अध्ययन गरिरहेको ताइवानले बताएको छ।

ताइवानको रक्षा मन्त्रालयले युक्रेनमा युद्धको रणनीतिबारे अध्ययनका लागि एक समूह नै गठन गरेको छ।

समाचार एजेन्सी रोयटर्सका अनुसार त्यस समूहलाई यति दिनसम्म रुसविरुद्ध युद्धमा डटिरहने युक्रेनको रणनीतिबारे अध्ययन गर्न जिम्मा दिइएको छ। ताइवानले यसबारे अमेरिकासँग पनि छलफल गरिरहेको अधिकारीहरूले जनाएका छन्।

चीन र ताइवानबीच पुरानो विवाद छ। चीनले ताइवानलाई आफ्नो एक प्रान्त मान्दै आएको छ। र, त्यो एक दिन चीनको हिस्सा बन्ने बताउँदै आएको छ।

तर, ताइवान आफूलाई एक स्वतन्त्र मुलुक दाबी गर्छ। ताइवानको आफ्नै संविधान छ। र, जननिर्वाचित सरकारले शासन चलाउँछ।

युक्रेनमाथि रुसको आक्रमणयता ताइवान हाइअलर्टमा बसेका छ। चीनले पनि रुसकै जस्तो गरी आफूमाथि आक्रमण गर्ने त्रास ताइवानमा पनि देखिन्छ। तर, चीनले रुसको जसरी आक्रमण गर्ने कुनै संकेत दिएको छैन।

युद्ध लड्ने तरिकाबारे अन्य मुलुकसँग सम्पर्क भइरहेको ताइवानका रक्षामन्त्री चिउ कुओ–चेङले बताए। र, सोही प्रयोजनका लागि एक समूह गठन गरिएको उनको भनाइ छ। उनका अनुसार रुसी सेनाको खराब प्रदर्शन र रुसका सेनालाई रोक्ने युक्रेनको क्षमतालगायत विषयमा ताइवानले गहिरो अध्ययन गरिरहेको छ।