काठमाडौँ । बेलायतले युक्रेनलाई दुई मिलियन पाउण्ड बराबरको अत्यावश्यक खाद्यान्न सहयोग गर्ने भएको छ । बेलायतका विदेश मन्त्रालयले एक विज्ञप्ति जारी गर्दै उक्त सहयोग गर्ने जानकारी दिएको हो ।
बेलायतले रुसी सेनाले घेरिएको युक्रेनका द्वन्द्व ग्रस्त क्षेत्रमा अत्यावश्यक खाद्यान्न आपूर्तिका लागि दुई मिलियन उपलब्ध गराउने तयारी गरेको विदेशमन्त्री ट्रसले जानकारी दिए । मन्त्रालयका अनुसार हाल युक्रेनमा १२ मिलियनभन्दा बढी मानिसलाई मानवीय सहायताको खाँचो देखिएको छ यो वास्तविक संख्या अझ बढी हुन सक्छ ।
‘पोल्याण्ड र स्लोभाकियाका गोदाम अर्को हप्ताको शुरुदेखि युक्रेन सरकारलाई यी सामान आपूर्ति गर्न तयार छन्, त्यसपछि लगभग २५ ट्रक लोडहरू सडक र रेलमार्फत स्थानीय युक्रेनी समुदायहरूमा ढुवानी गरिने छ,’ विज्ञप्तिमा जनाइएको छ ।
गत फेब्रुअरी २४ मा डोनेट्स्क र लुहान्स्कका टुक्रिएका गणतन्त्रले युक्रेनी उत्तेजनाविरुद्ध आफूलाई बचाउन मद्दतका लागि अपील गरेपछि रुसले युक्रेनमा सैन्य कारबाही शुरु गरेको हो ।
रुसको कारवाहीको जवाफमा पश्चिमी देशले मस्कोविरुद्ध व्यापक प्रतिबन्ध अभियान चलाएका छन् ।
