श्रीलंकामा उत्पन्न आर्थिक संकटका कारण विदेशबाट आउने कागज र मसीको चरम अभाव देखिएको छ। यसको कारणले त्यहाँको सरकारले देशभरका विद्यालयको वार्षिक परीक्षा रद्द गरेको छ।
श्रीलंकाले अहिले सन् १९४८ मा स्वतन्त्र भए यताकै गम्भिर आर्थिक संकटसँग जुधिरहेको छ।
कागजको चरम अभावको कारण सोमबारबाट सुरु हुने भनिएको वार्षिक परीक्षा अनिश्चितकालका लागि पछाडि धकेलिएको श्रीलंकाको शिक्षा निकायले मिडियासँगको कुराकानीमा पुष्टि गरेको छ।
‘कागज र मसी किन्नको लागि विदेशी विनियम सुरक्षित गर्न नसकेकाले विद्यालयका प्रधानाध्यापकहरूले परीक्षा गर्न सकेका छैनन्,’ पश्चिमी प्रान्तका शिक्षा विभागका अधिकारीको भनाइ अन्तर्राष्ट्रिय सञ्चार माध्यम गार्जियनले लेखेको छ।
आधिकारिक स्रोतका अनुसार अहिलेको संकटको कारणले देशका झण्डै ४५ लाख विद्यार्थीमध्ये दुई तिहाइको परीक्षामा रोकिनेछ।
श्रीलंकामा विदेशी विनियम सञ्चिती कमजोर भएकाले उसले विदेशबाट आवश्यक सामग्री आयात गर्न सकिरहेको छैन। पछिल्लो आर्थिक संकटले त्यहाँ खाद्यान्न, इन्धन र औषधिजस्ता अत्यावश्यक समाग्रीमा समेत कमी हुन थालेको छ।
यो साता श्रीलंकाले खस्कँदो विदेशी मुद्राको सञ्चितीलाई सम्बेधन गर्न अन्तर्राष्ट्रिय मुद्रा कोषसँग आर्थिक सहयोग माग्ने घोषणा गरेको छ। शुक्रबार नै आईएमएफले यसको पुष्टि गरेको छ। आईएमएफका अनुसार बुधबार श्रीलंकाली प्रधानमन्त्री गोतावाया राजापाक्षले सो संगठनसँग आर्थिक उद्दारबारे छलफल गर्न आग्रह गरे।
कोलम्बोले यो वर्ष झण्डै ६.९ अर्ब डलर ऋण तिर्नुपर्नेछ। जब कि, फेब्रुअरीमा उसको विदेशी मुद्रा सञ्चिती जम्मा २.३ अर्ब डलर थियो। देशभरका किराना पसल तथा तेल डिपोमा उपभोक्ताको लामो लाइन लाग्न थालेको छ।
सरकारले विदेशबाट आयात हुने तेलबाट उत्पादित हुने बिजुलीमा समेत असर परेपछि लोडसेडिङ तालिका सार्वजनिक गरेको छ। यस्तै, आम उपभोक्ताका लागि दूध पाउडर, चिनी, दाल–चामललगायत दैनिक उपभोग्य सामग्रीको खरिदमा कोटा लगाइएको छ।
श्रीलंकाले यो वर्षको प्रारम्भमा उसको प्रमुख ऋणदाता चीनसँग उसले पाउनुपर्ने ऋणको किस्ता केही विलम्ब गरिदिन आग्रह गरेको थियो। तर, सो आग्रहप्रति चीनले कुनै प्रतिक्रिया दिएन।
