काठमाडौँ । बेलायतका प्रधानमन्त्री बोरिस जोनसनले युक्रेनमा जारी रुसको सैन्य कारबाहीका बीचमा राष्ट्रपति भोलोडिमिर जेलेन्स्की र उनको परिवारलाई शरण दिने प्रस्ताव गरेको बताएका छन्।
जोनसनले सन्डे टाइम्सलाई बताएअनुसार जेलेन्स्कीसँग नियमित कुराकानी हुन्छ र उनी एक ‘निक्कै आकर्षक व्यक्तित्व भएको र प्रेरणाको स्रोत साबित भएका छन्।’
यसअघि अमेरिकाले जेलेन्स्कीलाई उद्धार गर्न सैन्य विमान पठाउने उद्घोष गरेको थियो। अमेरिकाको उक्त प्रस्तावमा जेलेन्स्कीले उद्धार गर्ने विमानभन्दा हतियार दिन आग्रह गर्दै उक्त प्रस्ताव अस्वीकार गरिदिएका थिए।
बेलायती प्रधानमन्त्रीका अनुसार जेलेन्स्की र उनको परिवारले बेलायतमा शरण लिने सम्भावनाबारे छलफल भएको थियो। उक्त छलफलमा भनिएको थियो, ‘भोलोडिमिर सधैँ स्पष्ट रहेका छन्, उनको कर्तव्य युक्रेनी जनताप्रति हो, उनी त्यहीँ बस्ने छन् र जनताको हेरचाह गर्ने छन्। म उनको प्रशंसा गर्छु।’
यता रुसले भने विशेष अपरेशनको उद्देश्य युक्रेनलाई असैन्यीकरण र ‘डिनाजिफाइ’ गर्नु हो र केवल सैन्य पूर्वाधारलाई लक्षित गरिएको छ। नागरिक जनसंख्या खतरामा छैन। मस्कोले बारम्बार जोड दिँदै भनेको छ उसको युक्रेन कब्जा गर्ने कुनै योजना छैन।
रुसी राष्ट्रपति भ्लादिमिर पुटिनका अनुसार डोनबासका जनतालाई जोगाउने लक्ष्य रहेको छ, ‘जो आठ वर्षदेखि किभ शासनद्वारा दुर्व्यवहार र नरसंहारको शिकार भएका छन्।’
रुसको अपरेशनको प्रतिक्रियामा, पश्चिमी देशले मस्कोविरुद्ध व्यापक प्रतिबन्ध अभियान चलाएका छन्। जसमा धेरै रूसी अधिकारी र संस्था, मिडिया र वित्तीय संस्थालाई लक्षित गर्ने हवाई क्षेत्र बन्द र प्रतिबन्धात्मक उपाय समावेश छन्।
