काठमाडौँ । युक्रेनमाथि रुसले सैन्य हमला गरेको २४ औँ दिन पुगेको छ। युद्धमा हजारौँ सैनिकले ज्यान गुमाउनका साथै घाइते भएका छन्। घाइते सैनिकहरूलाई राष्ट्रपति भोलोदिमिर जेलेन्स्कीले अस्पतालमा पुगेर भेटेका छन्।
राष्ट्रपति जेलेन्स्कीले घाइते सैनिकसँग कुराकानी गरेका छन्। साथै उनीहरूसँग सेल्फी खिचाएको भिडियो सार्वजनिक भएको छ।
राष्ट्रपति जेलेन्स्कीले रुससँग जारी युद्धमा घाइते भएका सैनिक र अस्पतालका कर्मचारीहरूलाई पदक पनि दिएका थिए। केही दिनअघि जेलेन्स्कीले रुसले युक्रेनमाथि आक्रमण गरेपछि १,३०० युक्रेनी सैनिक र झण्डै १२,००० रुसी सैनिकको मृत्यु भएको दाबी गरेका थिए।
एउटा पत्रकार सम्मेलनमा बोल्दै उनले शुक्रबारसम्म झण्डै ५०० देखि ६०० रुसी सैनिकले युक्रेनमा आत्मसमर्पण गरेको दाबी गरे। तर, उनको दाबीमा पुष्टि हुन सकेको छैन।
जेलेन्स्कीले युद्धमा ज्यान गुमाउने रुसी सैनिकको संख्या ठूलो भएको भए पनि आफू त्यसप्रति खुसी नभएको बताए। ‘उनीहरूले अनुमानित १२ हजार जना गुमाउँदा मलाई प्रसन्नता छैन, यसले मलाई खुसी बनाउँदैन, संसारलाई हेर्ने मेरो दृष्टिकोण त्यस्तो छैन,’ उनले भने।
