जर्मनीले तत्कालै रुसी ग्यास तथा तेलमा प्रतिबन्ध लगाउन नसक्ने बताएको छ। जर्मनीका आर्थिक र उर्जा मन्त्री रोबर्ट हवेकले सरकारी टीभी एआरडीसँगको कुराकानीमा यो कुरा स्पष्ट गरेका हुन्। टेलिभिजन संवादका क्रममा मन्त्री हेबेकले रुसी तेलबिना उनको मुलुकले सामना गर्नुपर्ने कयौँ कठिनाईको सूची नै प्रस्तुत गरेका थिए।

हेबेकका अनुसार रुसी तेलबिना जर्मनीमा ठूलो संख्यामा मानिसले बेरोजगार हुनेछन्, जो कालान्तरमा गरिबीमा धकेलिने छन् । ‘त्यति मात्र होइन, मानिसहरुसँग अति चिसो मौसममा घर न्यानो बनाउन र सवारी साधन चलाउन इन्धनको विकल्प उपलब्ध हुने छैन,’ सत्तारुढ गठबन्धनको एक ग्रिन पार्टीबाट मन्त्री बनेका हेबेकले भने।

जर्मनी पश्चिमी मुलुकहरुमध्ये सबैभन्दा बढी रुसी उर्जामा निर्भर छ। जर्मनीले प्रयोग गर्ने कूल प्राकृतिक ग्यासको ५५%, कोइलाको ५२% र खनिज तेलको ३४ % भाग रुसबाट किनिरहेको छ। आलोचकहरुले रुसबाट इन्धन किन्नु अप्रत्यक्ष रुपमा युक्रेनमाथिको रुसी आक्रमणलाई आर्थिक सहयोग गरे बराबर हुने बताएका छन्। इन्धनको निर्यात रुसको आयको प्रमुख स्रोत रहँदै आएको छ।

जर्मनीले यो गर्मी ऋतुभित्र रुसी कोइलाको प्रयोग त्याग्न सक्ने र यही वर्षको अन्तिमसम्म तेलमा पनि विकल्प खोज्न सक्ने बताएको छ।

जर्मनीले यसअघि आफूहरुले तत्कालै रुसी इन्धन बहिष्कार गर्न नसके पनि समय तालिका बनाएर चरणबद्ध रुपमा तिनको प्रयोग रोक्न सक्ने बताएको थियो। ‘हामीहरु कोइला, तेल र यहाँसम्म कि ग्यासमा समेत चरणबद्ध रुपमा आत्मनिर्भर हुन सक्छौँ। तर, अहिलै नै तिनको प्रयोग रोक्न असमर्थ छौँ, नैतिक रुपमा यस्तो स्वीकारोत्ति त्यति राम्रो सुनिदैन तर यही नै हाम्रो यथार्थ हो,’ हेबेकले भने ।

जर्मनीले यो गर्मी ऋतुभित्र रुसी कोइलाको प्रयोग त्याग्न सक्ने र यही वर्षको अन्तिमसम्म तेलमा पनि विकल्प खोज्न सक्ने बताएको छ। तर, ग्यासमा भने उसले त्यस्तो अल्पकालीन समयसीमा तोक्न नसक्ने बाध्यता रहेको देखाएको छ।

युरोपको सबैभन्दा ठूलो अर्थतन्त्र जर्मनी अल्पकालका लागि उर्जाको आपूर्तिलाई विविधिकरण गर्न खोज्दैछ। तर, यो कठिन विकल्प हो। किनकी सरकारले हाल सोचविचार गरिरहेको वायु तथा सौर्य उर्जा फार्मको निर्माणमा समय लाग्छ। जर्मन सरकारले अन्य देशबाट प्राकृतिक ग्यास निर्यात गर्नका लागि ब्रुन्सबुटेल र विल्हेल्मबभेनमा टर्मिनल निर्माण गर्ने बताएको छ। जसमा सामान्यतय पाँच वर्ष लाग्ने गर्छ।

अमेरिकाले सन् २०२१ मा उसको कच्चा तेलको आवश्यकताको ८ प्रतिशत हिस्सा मात्र रुसबाट पूरा गरेका उसलाई यो निर्णयले त्यति असर गर्ने छैन।

अन्य पश्चिमी देशले जर्मनीमाथि रुसी इन्धन बहिष्कार गर्न दबाब दिइरहेका छन्। हालै अमेरिकाले रुसी तेल आयातमा प्रतिबन्ध लगाएको छ। अमेरिकाले सन् २०२१ मा उसको कच्चा तेलको आवश्यकताको ८ प्रतिशत हिस्सा मात्र रुसबाट पूरा गरेका उसलाई यो निर्णयले त्यति असर गर्ने छैन। त्यस्तै अमेरिकालाई पछ्याउँदै बेलायतले पनि यो वर्षको अन्त्यसम्म रुसी तेल आयोग रोक्ने घोषणा गरेको छ।

युक्रेनमा रुसले आक्रमण सुरु गरेदेखि जर्मनीले विगतको तटस्थताको मार्ग परित्याग गर्दै युक्रेनलाई हतियार दिनेजस्ता केही कठोर विदेश नीति अंगीकार गरेको छ। तथापि, इन्धन बहिष्कार कार्यन्वयन गर्ने कुरामा भने उसले आफ्नो अफ्ठ्यारो बुझिदिन आफ्ना साझेदार मित्र शक्तिहरुसँग आग्रह गरेको छ।

विभिन्न थिंकट्यांक तथा आर्थिक संस्थानहरुले गरेको प्रक्षेपणअनुसार जर्मन सरकारले तत्काल रुसी ग्यास आपूर्ति बन्द गर्यो भने जर्मनीको कूल ग्राहस्थ उत्पादन ०.१ प्रतिशतदेखि ५.२ प्रतिशतसम्म खुम्चिन सक्ने देखाएको छ।

द गार्जियनबाट