काठमाडौँ । भारतमा जारी निर्वाचनमा पञ्जाब राज्यमा आम आदमी पार्टी (आप)ले दुई तिहाइ बहुमत हासिल गर्ने भएको छ । विधानसभा निर्वाचनमा पञ्जाबको ११७ सिटमध्ये आम आदमीले ८८ सिटमा अग्रता लिएको छ ।
पञ्जाबमा सरकार बनाउन चाहिने बहुमत सिट जम्मा ५९ मात्रै हो । दुई तिहाई बहुमतका लागि ७८ सिट आवश्यक रहेको छ । तर, अहिलेसम्म आम आदमीले ८८ सिटमा अग्रता लिँदै आएको छ । यही अग्रता कायम रहे आम आदमीले पञ्जाबमा दुई तिहाई बहुमतसहित सरकार बनाउने छ ।
आम आदमी सन् २०१७ मा भएको विधानसभा निर्वाचनभन्दा ६८ सिटमा अगाडि देखिएको छ । कांग्रेस, भाजपालगायत ठूला दलहरू निकै पछाडि रहेको छ ।
भारतको राजधानी दिल्लीमा आम आदमी नेतृत्वको सरकार रहँदै आएको छ । पार्टीका अध्यक्ष अरविन्द केजरीवालले आठ वर्षदेखि दिल्ली सरकारको नेतृत्व गरिरहेका छन् ।
विधानसभा निर्वाचनअगाडि गरिएको मत सर्वेक्षणमा पञ्जाबमा आम आदमीले ७६ देखि ९० सिट जित्ने अनुमान गरिएको थियो ।
