युक्रनमाथि आक्रमणका कारण अमेरिका, युरोपियन युनियन, बेलायत, क्यानाडालगायत मुलुकले रुसी राष्ट्रपति भ्लादिमिर पुटिनका ६ जना विश्वासपात्र व्यापारीहरूमाथि प्रतिबन्ध लगाएका छन्। ती मुलुकमा रहेको उनीहरूको सम्पत्ति रोक्का गरिएको छ। जसका कारण उनीहरू बर्बादीको दिशातर्फ छन्। र, युक्रेनमाथि ज्यादतीपूर्ण आक्रमणपछि रुसको अर्थतन्त्र नै धर्मराएको छ। यी हुन् ती अर्बपतिहरू :

एलिसर उस्मानोभ

पुटिनका अति विश्वास प्राप्त एलिसर उस्मानोभ विश्वका सबैभन्दा धनी व्यक्तिमध्ये एक हुन्। उनको कुल सम्पत्ति करिब १७.६ अर्ब डलर छ। उस्मानोभमाथि अमेरिका, युरोपियन युनियन र बेलायतले प्रतिबन्ध लगाएका छन्।

रोमन इब्रामोभिच

फुटबल क्लब चेल्सीको सफलतापछि रोमन इब्रामोभिच हाई–प्रोफाइल अर्बपतिहरूको सूचीमा सामेल भए। उनीमाथि कुनै मुलुकले अहिलेसम्म प्रतिबन्ध लगाएका छैनन्। सम्भवतः उनी पुटिनका बाँकी निकटस्थ व्यापारीहरूमध्ये सबैभन्दा प्रभावशाली हुन्।

१२.३ अर्ब डलर कुल सम्पत्ति रहेका उनले गत बुधबार तीन अर्ब डलरमा आफ्नो चेल्सी फुटबल क्लब र लण्डनस्थित घर १.५ करोड पाउन्डमा बिक्री गर्न चाहेको बताएका छन्। प्रतिबन्ध नलाग्दा पनि उनी आर्थिक संकटबाट घेरिइसकेको प्रमाण हो यो।

ओलेग देरिपास्का

पुटिन सत्तामा आएको समयमै ओलेग देरिपास्का रुसका अत्यधिक धनी व्यक्तिमध्ये एक थिए। उनको कुल सम्पत्ति २.८ करोड डलर थियो। अहिले उनीसँग तीन अर्ब डलरबराबरको सम्पत्ति छ।

अमेरिकाले उनीमाथि प्रतिबन्ध लगाएको छ। उनी मनी लन्ड्रिङ, घूसखोरीलगायत अवैध गतिविधिमा संलग्न रहेको आरोप अमेरिकाले लगाएको छ।

आइगर सेचिन

युरोपियन युनियनले आइगर सेचिनमाथि २८ फेब्रुअरीमा प्रतिबन्ध घोषणा गरेको छ। उनी पुटिनका एक विश्वासपात्र व्यापारी हुन्। उनको कुल सम्पत्ति कति छ भन्ने यकिन जानकारी उपलब्ध छैन। अमेरिकाले उनीमाथि २४ फेब्रुअरीमा प्रतिबन्ध घोषणा गरेको छ। सन् २०१४ मा पनि अमेरिकाले उनीमाथि प्रतिबन्ध लगाएको थियो।

एलेक्सी मिलर

एलेक्सी मिलर पनि पुटिनका निकटस्थ साथी मानिन्छन्। सन् २०१४ मा क्रिमियामाथि रुसले कब्जा गर्दा उनीमाथि प्रतिबन्ध लगाइएको थिएन। तर, सन् २०१८ मा अमेरिकाले आफूमाथि प्रतिबन्ध लगाउँदा मिलरले त्यसलाई गर्वको विषय भनेका थिए। उनको पनि कुल सम्पत्ति कति छ भन्ने यकिन छैन।

प्योट्र एभेन र मिखायल फ्रिदम्यान

युरोपियन युनियनले यी दुवै व्यापारीमाथि प्रतिबन्ध घोषणा गरेको छ। दुवै मिलेर रुसको सबैभन्दा ठूलो निजी बैंक अल्फा बैंक खडा गरेका हुन्। मिखायलसँग करिब १२ अर्ब डलरको सम्पत्ति भएको अनुमान छ। उनी लन्डनको लर्ड्स क्रिकेट मैदाननजिकको ठूलो बंगलामा बस्छन्। उनले सन् २०१६ मा ६.५ करोड पाउन्डमा उक्त बंगला खरिद गरेका थिए। यस्तै एभेनसँग ४.८ अर्ब डलरको सम्पत्ति भएको अनुमान छ।