काठमाडौँ । पाकिस्तानको उत्तर पश्चिमी शहर पेशावरमा रहेको खैबर पख्तुनख्वा प्रान्तको मस्जिदमा शुक्रबार शक्तिशाली विस्फोट भएको छ । विस्फोटमा कम्तीमा ३० जनाको मृत्यु भएको छ भने ५० भन्दा बढी घाइते भएको प्रहरी बताएका छन् ।
दुई आतंककारीले मस्जिदभित्र पस्ने प्रयास गर्दा त्यहाँ ड्युटीमा रहेका प्रहरीबीच गोली हानाहान भएको थियो । यस क्रममा एक प्रहरीको मृत्यु भएको र अर्का गम्भीर घाइते भएको पेशावरका प्रहरी अपरेसनका वरिष्ठ सुपरिटेन्डेन्ट हारुन रसिदले बताएका छन् ।
गोलीबारीको घटनालगत्तै मस्जिदभित्र विष्फोट भएको बताउँदै उनले प्रारम्भिक अनुसन्धानका अनुसार त्यहाँ प्रार्थना गर्नेमाथि आत्मघाती हमला भएको बताएका छन् । उद्धार टोली, प्रहरी र सुरक्षा बल घटना स्थलमा पुगेर घाइतेलाई लेडी रिडिङ अस्पतालमा लगिएको थियो । घाइतेमध्ये १० जनाको अवस्था गम्भीर रहेको छ ।
पाकिस्तानी प्रधानमन्त्री इमरान खानले मस्जिदमा भएको घातक हमलाको निन्दा गर्नुका साथै घाइतेलाई उपचार गराउन निर्देशन दिएका छन् ।
प्रधानमन्त्रीले विस्फोटबारे सम्बन्धित निकायबाट विस्तृत प्रतिवेदन लिन आग्रह गरको छन् । कुनै पनि समूहले आक्रमणको जिम्मा लिएका छैनन् ।
