रुसी सेनाको आक्रमणका कारण युक्रेनको सबैभन्दा ठूलो परमाणु प्लान्टमा आगलागी भएको छ। युक्रेनी राष्ट्रपति भोलोदिमिर जेलेन्स्कीले युरोपकै ठूलो जेपोरजिया परमाणु प्लान्टमा रुसले जानाजान आगो लगाएको बताएका छन्।
सामाजिक सञ्जालमार्फत आगलागी पुष्टि गर्दै जेलेन्स्कीले युरोपको सबैभन्दा ठूलो परमाणु प्लान्ट खतरामा रहेको बताएका हुन्। उनका अनुसार उक्त परमाणु प्लान्टमा ६ वटा रियाक्टर छन्। र, केही गरी ती रियाक्टर विष्फोट भएमा सन् १९८६ मा युक्रेनकै चेर्नोभिलमा भएको भन्दा ठूलो दुर्घटना हुने उनले बताएका छन्।
‘कृपया युरोपका बासिन्दा जाग्नुहोस्, आफ्ना नेताहरूलाई भन्नूस्, रुसी सेना युक्रेनको परमाणु प्लान्टमा निरन्तर आक्रमण गरिरहेको छ,’ जेलेन्स्कीले भनेका छन्।
आफू अमेरिका, बेलायत र युरोपियन युनियनका नेताहरूसँग निरन्तर सम्पर्कमा रहेको पनि उनले उल्लेख गरेका छन्। आफूले इन्टरनेसनल टमिक इनर्जी एजेन्सीसँगका अधिकारीहरूसँग पनि कुरा गरेको उनले बताएका छन्।
उक्त परमाणु प्लान्ट युक्रेनको दक्षिण–पूर्वी क्षेत्रमा छ। लगातार बम र गोलीबारीका कारण आगो निभाउन असहज भएको युक्रेनी अधिकारीहरूले बताएका छन्।
हार्भर्ड विश्वविद्यालयका परमाणु सुरक्षा विशेषज्ञ ग्राहम एलिसनका अनुसार आगलागीका कारण चेर्नोभिलजस्तै दुर्घटना भयो भने त्यसको परिणाम भयानक हुन सक्छ। उक्त परमाणु प्लान्टलाई अफलाइन बनाएर त्यस क्षेत्रको विद्युत प्रसारण बन्द गराउने रुसी प्रयास हुन सक्ने उनको भनाइ छ।
जेपोरजियाका स्थानीय प्रशासन प्रमुखले भने हालसम्म परमाणु प्लान्टमा विष्फोटको खतरा नदेखिएको बताएका छन्। तथापि, सम्भावित दुर्घटनालाई मध्यनजर गर्दै उक्त परमाणु प्लान्ट आसपास सैन्य कारवाही रोक्न इन्टरनेसनल अटोमिक इनर्जी एजेन्सी (आईएईए)का महानिर्देशक रफाइल ग्रोसीले रुससँग आग्रह गरेका छन्।
युक्रेनी विदेशमन्त्री दिमित्रो कुलेबाले रुसी सैनिकले परमाणु प्लान्टमाथि रुसी सैनिकले चौतर्फी घेरा हालेर गोलीबारी गरिरहेको बताएका छन्। युक्रेनको विद्युतीय ग्रिड सोही प्लान्टमा आधारित छ। उक्त प्लान्टले युक्रेनमा बिजुलीको २५ प्रतिशत माग धान्दै आएको छ।
बीबीसीबाट
