सुनसरी- बराहक्षेत्र नगरपालिकास्थित सार्वजनिक शारीरिक व्यायामशाला हिजोदेखि खोलिएको छ। यो भवन तीन वर्षदेखि अलपत्र थियो।
बराहक्षेत्र–२ वडा कार्यालयको पहलमा खोलिएको हो । सार्वजनिक जिम हलबारे व्यापक जनगुनासो आएपछि वडाध्यक्ष होमप्रसाद गौतमले चासो लिँदै अलपत्र अवस्थामा रहेको जिम हलको भवन पुगी ढोकामा लगाएको ताला खोलेका हुन्।
वडाध्यक्ष गौतमलाई साथ दिन वडा सदस्य प्रेम दाहाल, झापड कटवाल, महिला वडा सदस्य चुनु श्रेष्ठ, सिर्जना परियार, राजनीतिक दलका प्रतिनिधि, स्थानीय सरोकारवालाहरूको उपस्थिति थियो।
आजदेखि सरसफाइ गरी नियमित शारीरिक व्यायाम गराइने वडाध्यक्ष गौतमले बताए। जीवन विज्ञानले सञ्चालन गर्दै आएको योग प्रशिक्षण केही समयपछि उक्त भवन सार्ने तयारी भइरहेको उनले बताए ।
तत्कालीन सांसद जयकुमार राईको पहलमा स्थानीय विकास पूर्वाधार साझेदारी कार्यक्रमअन्तर्गत सांसद विकास कोषवाट ३० लाख रुपैयाँमा बराहक्षेत्र नगरपालिका–२ पुनर्वासमा उक्त व्यायामशाला भवन निर्माण भएको थियो। तर, त्यसको सञ्चालन अलपत्र परेको थियो ।
आवश्यक सामग्री जुटाएर चाँडोभन्दा चाँडो सञ्चालनमा ल्याउन समिति लागि परिरहेको जिम हल सञ्चालन समितिका सचिव गम्भीर दाहालले बताए । युवा, युवतीदेखि ज्येष्ठ नागरिकसम्मका लागि स्वस्थ र तन्दुरुस्त रहन व्यायाम अत्यावश्यक रहेको र सार्वजनिक व्यायामशालामा आवश्यक सामग्रीहरू उपलब्ध हुनुपर्ने स्थानीय सन्तोष श्रेष्ठले बताए ।
बराहक्षेत्र-२ पुनर्वासका माधव थापाले आफूले भोगचलन गर्दै आएको २ कठ्ठा र अशोक कार्कीले १ कठ्ठा गरी ३ कठ्ठा ऐलानी जमिन उक्त जिम हलका लागि उपलब्ध गराएका थिए।
जिम हलप्रति स्थानीय जनप्रतिनिधिहरूको ध्यानाकर्षण हुनु खुशीको विषय भएको जिम हल सञ्चालन समितिका अध्यक्ष रविन राईले बताए । १२ मंसिर ०७७ मा तत्कालीन सांसद जयकुमार राईले त्यसको उदघाटन गरेका थिए।