काठमाडौं- आज तीनवटा प्रदेशका केही ठाउँमा भारी वर्षा हुने पूर्वानुमान जल तथा मौसम विज्ञान विभागले गरेको छ।
विभागका अनुसार कोशी, मधेश र गण्डकीका केही स्थानमा मेघ गर्जन र चट्याङसहित भारी वर्षाको सम्भावना छ। हाल मनसुनको न्यून चापीय रेखा सरदर स्थानको दक्षिणतिर अवस्थित छ। साथै, भारतको झारखण्डमा विकसित न्यून चापीय क्षेत्रको प्रभाव पनि नेपाली आकाशमा देखिएको छ।
आज दिउँसो कोशी, मधेश, वागमती र गण्डकीमा सामान्य बदली रही बाँकी भूभागमा आंशिकदेखि सामान्य बदली रहनेछ। कोशी, मधेश, वागमती र गण्डकीका केही तथा बाँकी प्रदेशका थोरै स्थानमा हल्कादेखि मध्यम वर्षाको सम्भावना छ। कोशी, मधेश र गण्डकीका केही स्थानमा भारी वर्षाको सम्भावना छ। यस्तै, लुम्बिनी, मधेश र कोशीको तराई इलाकामा हावाहुरी आउने सम्भावना पनि छ।
आज राति देशभर आंशिकदेखि सामान्य बदली रहनेछ। कोशी, मधेश, वागमती र गण्डकीका थोरै तथा बाँकी भूभागका एक वा दुई स्थानमा हल्कादेखि मध्यम वर्षाको सम्भावना छ।