काठमाडौं- आज ४ सेप्टेम्बर। विश्व इतिहासका विभिन्न परिघटनाले आजको दिनलाई सम्झाउँछन्। प्रस्तुत छ, तीमध्ये केही प्रमुख घटनाको सारसंक्षेप।
– सन् २००२- केली क्लाक्सन पहिलो अमेरिकी आइडल
गायक, रचनाकार तथा ग्रामी अवार्ड विजेता केली क्लाक्सन अमेरिकन आइडलको पहिलो विजेता बनेकी थिइन्। उक्त अमेरिकी टेलिभिजन रियालिटी सोलाई र्यान सिक्रेस्ट र ब्रायन डंकलम्यानले होस्ट गरेका थिए। यस्तै, पाउला अब्दुल, सिमोन कोवेल र र्यान्डी ज्याक्सन जज थिए। उक्त लोकप्रिय रियालिटी सोलाई फक्स टेलिभिजन नेटवर्कले प्रसारण गरेको थियो। हालसम्म यसको १४ वटा सिजन सम्पन्न भएको छ।
– सन् १९९८- गुगलको स्थापना
संसारभर लोकप्रिय इन्टरनेट कम्पनी गुगल आजकै दिन स्थापना भएको थियो। स्थापनाको २५ वर्षे इतिहासमा गुगल अहिले सूचना प्राप्त गर्ने भरपर्दो अनलाइन प्लेटफर्म बनेको छ। गुगलको सिर्जना ल्यारी पेज र सर्गेई ब्रिनले गरेका हुन्। अमेरिकाको क्यालिफोर्नियास्थित स्ट्यानफोर्ड युनिभर्सिटीमा डक्टरल विद्यार्थी रहेका पेज र ब्रिनले आफ्नो रिसर्च प्रोजेक्टमार्फत गुगल स्थापनाको खाका कोरेका थिए।
– सन् १९९८- को बन्न चाहन्छ करोडपति बेलायतबाट शुरु
लोकप्रिय क्विज गेम सो ‘को बन्न चाहन्छ करोडपति’ बेलायतमा आजकै दिन शुरु भएको थियो। अहिले यस्तै क्विज गेम सो भारतलगायत मुलुकमा लोकप्रिय छन्। छोटो समयमा तीव्र गतिमा कठिन प्रश्नहरूको जवाफ दिएर नगद पुरस्कार जित्नु यस सोको मुख्य उद्देश्य हो। डेभिड ब्रिग्स, माइक ह्वाइटहिल र स्टिभन नाइटले बेलायतमा यसको शुरुवात गरेका थिए। आईटीसी टेलिभिजनले यसलाई प्रसारण गरेको थियो। क्रिस टेरेन्टले सन् २०१४ सम्म ब्रिटिस संस्करणको होस्ट गरेका थिए।
– सन् १८८८- कोडाक कम्पनी स्थापना
प्रिन्टिङ एन्ड इमेजिङ कम्पनी कोडाक १३५ वर्षअघि आजकै दिन स्थापना भएको हो। यसलाई इस्टम्यान कोडाक कम्पनीका नामबाट पनि चिनिन्छ। जर्ज इस्टम्यानले यसको स्थापना गरेका हुन्। रिलवाला क्यामेराको प्याटेन्ट राइट पनि आजकै दिन इस्टम्यानले प्राप्त गरेका थिए। कोडाक स्थापनापछि फोटोग्राफीको आयाम नै बदलिएको थियो।
– सन् १८७०- फ्रान्सका सम्राट नेपोलियन थर्ड सत्ताच्युत
फ्रान्सका प्रथम निर्वाचित राष्ट्रपति नेपोलियन थर्डलाई आजकै दिन सत्ताच्युत गरिएको थियो। शुरुमा राष्ट्रपति निर्वाचित भएका उनले सन् १८५२ मा आफूलाई सम्राट घोषणा गरेका थिए। फ्रान्को-पर्सियन युद्धमा आत्मसमर्पण गरेको आरोप लगाउँदै उनलाई सत्ताबाट हटाइएको थियो। सत्ताच्युत भएपछि उनी इंग्ल्यान्डमा निर्वासित भएका थिए। त्यहीं उनको ९ जनवरी १८७३ मा मृत्यु भएको थियो।