इस्लामावाद- पाकिस्तानको राजधानी इस्लामावादमा आयोजित च्यारिटी बजारमा त्यहाँस्थित नेपाली दूतावासले बलियो उपस्थिति जनाएको छ ।
पाकिस्तानी विदेश मन्त्रालयद्वारा आयोजित ‘मोफा च्यारिटी बजार’मा नेपाली दूतावासको अलग्गै स्टल थियो । स्टलमा नेपाली परम्परागत उत्पादनहरू, हस्तकलाका सामान र पर्यटनका प्रडक्ट प्रदर्शनीमा राखिएको इस्लामावादस्थित नेपाली राजदूत तापस अधिकारीले जानकारी दिए ।
उनका अनुसार ‘च्यारिटी बजार’को फुड फेस्टिभलमा पनि दूतावासले अलग स्टल राखेको थियो । र, सहभागीहरूलाई मःमको स्वाद चखाएको थियो ।
‘च्यारिटी बजार’मा प्रमुख अतिथि तथा पाकिस्तानी राष्ट्रपति अरिफ एल्भीकी पत्नी समिना एल्भीले नेपाली स्टलमा पुगेर चासो पूर्वक नेपाली उत्पादनको अवलोकन गरेकी थिइन् । उनलाई नेपाली राजदूत अधिकारीले मायाको चिनो हस्तान्तरण गरेका थिए ।
उक्त बजारमा इस्लामावादस्थित विदेशी नियोगहरूले आ–आफ्ना स्टल राखेका थिए । यस्तै, पर्यटन व्यवसायी, होटेल र अन्य व्यवसायीले आ–आफ्ना स्टल राखेका थिए ।
नेपाली स्टलमा पुगेका अधिकांश पाकिस्तानी र अन्य मुलुकका नागरिकले नेपालको संस्कृति र परम्परागत उत्पादनहरू प्रति चासो राखेका थिए ।