खार्तुम- सुडानमा सशस्त्र बलका प्रतिद्वन्द्वी समूहबीचको तनाव हिंसात्मक बन्दै गएपछि सुडानी अर्धसैनिक समूह ¥यापिड सपोर्ट फोर्सेज (आरएसएफ) ले राष्ट्रपति भवन कब्जामा लिएको छ।

प्रत्यक्षदर्शीहरूले बताएअनुसार राजधानी खार्तुमस्थित राष्ट्रपति भवन र सेनाको मुख्यालय वरपर भीषण भिडन्त भएको छ। आरएसएफले विज्ञप्ति जारी गर्दै खार्तुम, मारवा र अल-अबैदमा रहेका विमानस्थललाई आफ्नो नियन्त्रणमा लिएको र उडान रद्द गरिएको दाबी गरेको छ।

आरएसएफका अनुसार उनीहरूले आफ्नो एउटा आधार शिविरमा सेनाले अचानक आक्रमण गरेपछि प्रतिरोध गरेका थिए। यसैबीच खार्तुमस्थित ‘थिंक ट्यांक कन्फ्लुएन्स एडभाइजरी’का संस्थापक निर्देशक खोलुद खैरले सेना र आरएसएफले सत्ता सुदृढीकरणका विषयमा आफ्नो विरोधी धारणाका कारण कहिल्यै तालमेल नगरेको बताएका छन्।