झापा- जिल्लाका १५ वटै पालिकाका उपप्रमुख तथा उपाध्यक्षहरूले आदिवासी सन्थाल समुदायलाई होच्याउने अपमानजनक ‘सतार’ शब्द अबदेखि कुनै पनि कागजातमा नलेख्ने निर्णय गरेका छन्।
मेचीनगर नगरपालिकाको सभाहलमा सोमबार झापाका उपप्रमुख तथा उपाध्यक्षहरूको जिल्ला समन्वय समितिको संयुक्त बैठक भएको थियो। सोही बैठकबाट यस्तो निर्णय गरिएको हो।
सीमान्तकृत तथा आदिवासी सन्थाल समुदायको पहिचान र आत्मसम्मानको कदर गर्दै यसअघि लेखिँदै आएको सतार शब्दको साटो सन्थाल शब्द प्रयोग गर्ने निर्णय गरिएको मेचीनगर नगरपालिकाकी उपप्रमुख मीना पोखरेल उप्रेतीले बताइन्।
झापामा सघन बसोबास गर्दै आएका सन्थाल समुदायले सतार शब्दको प्रयोग नगरिदिन आग्रह गर्दै सडक आन्दोलनसमेत गर्दै आएका छन्। उक्त समुदायले नेपाली शब्दकोश, पाठ्यपुस्तक, सरकारी कामकाज र सञ्चारमाध्यममा कतै पनि आत्मसम्मानमा ठेस पुग्ने सतार शब्द प्रयोग नगरिदिन आग्रह गर्दै आएको थियो।
बैठकले ‘सतार’ शब्दको सट्टा सन्थाल शब्द प्रयोग गर्ने र उनीहरूको नामको पछाडि सम्बन्धित थर नै उल्लेख गर्ने निर्णय गरेको उपप्रमुख उप्रेतीले जानकारी दिइन्। सन्थाल समुदायको हरेक प्रमाणपत्र तथा दस्तावेजमा नामको पछाडि वास्तविक थरहरू उल्लेख गर्न पालिकाका उपप्रमुख तथा उपाध्यक्षहरू सहमत भएका छन्। सन्थाल समुदायका हस्दा, मुर्मु, टुडु, मण्डललगायत १२ वटा थर हुन्छन्।