काठमाडौं- राष्ट्रिय युवा संघ नेपालले ‘एनवाईएफ सर्ट फिल्म प्रतियोगिता २०७८’ आयोजना गर्ने भएको छ। निषेधाज्ञाका कारण घरबाट बाहिर निस्कन नपाएका युवाको समय सदुपयोग तथा प्रोडक्टिभ इन्गेजमेन्टसँगै युवाको प्रतिभा पहिचान, प्रस्फुटन तथा प्रबर्द्धन गर्ने उद्देश्य प्रतियोगिता आयोजना हुन लागेको हो।
‘म केही गर्छु’ शीर्षकमा आयोजना हुन लागेको प्रतियोगितामा सहभागीका लागि उद्यमशीलता र रोजगार, पर्यटन, कृषि तथा उद्योग, राजनीति र सुशासन, शिक्षा, स्वास्थ्य, खेलकुद, लैंगिक समानता र विविधता, कला संस्कृति र मनोरञ्जनलगायत बिषयमा केन्द्रित रहेर बढीमा ५ मिनेट सम्मको फिल्म बनाएर आयोजकलाई पठाउनु पर्नेछ।
यसरी सहभागिताका लागि आएका स्क्रिप्टलाई विज्ञ समूहले अध्ययन गरी आवश्यक परामर्श तथा सुझाव दिनेछ। प्राप्त फिल्ममध्ये उत्कृष्ट तीन फिल्मलाई आयोजकले पुरस्कारको व्यवस्था गरेका छौँ। जसअनुसार पहिलो हुने फिल्मले २ लाख ५० हजार, दोस्रो हुने फिल्मले १ लाख ५० हजार र तेस्रो हुने फिल्मले १ लाख रुपैंया जित्न सक्ने आयोजकले जनाएको छ।
राष्ट्रिय युवा संघ नेपाल मुख्य आयोजक रहेको यो प्रतियोगिताको नेपाल फिल्म एकेडेमी सहआयोजक, नेसनल युथ काउन्सिलले प्रवद्र्धकमा रहेको छ। त्यसैगरी प्रतियोगितालाई चलचित्र विकास बोर्ड, नेपाल पर्यटन बोर्ड, अफरिङ ह्याप्पिनेस र प्रमोटर्स नेपालको समेत सहयोग रहनेछ।
