मेलबर्न- कोरोना महामारीले व्यवस्थापन गर्नै नसकिने स्तरमा मानसिक स्वास्थ्य समस्या ननिम्त्याएको शोधकर्ताहरूले निष्कर्ष दिएका छन्।
खासगरी, आम सर्वसाधारणमा ठूलो मानसिक स्वास्थ्य समस्या नदेखिएको उनीहरूको निष्कर्ष छ। कोभिड महामारीले संसारभर व्यवस्थापन गर्नै नसकिने तहमा मानसिक स्वास्थ्य समस्या देखिएको आकलन भइरहेका बेला पछिल्लो अध्ययनले त्यसलाई गलत सावित गरिदिएको छ।
पियर-रिभ्युड मेडिकल जर्नल ‘बीएमजे’मा प्रकाशित रिपोर्टअनुसार संसारभर महामारीका दौरान मानसिक स्वास्थ्यलाई लिएर १३७ वटा अध्ययन भएका थिए। ती अध्ययनहरूको विश्लेषणमार्फत आकलन गरिएको तहमा मानसिक स्वास्थ्य समस्या नदेखिएको हो।
‘मानसिक स्वास्थ्यलाई लिएर कोभिड-१९ महामारीको प्रभाव सुनामीका वर्णनकर्ता या अन्य केही अनुसन्धानकर्मीले सञ्चार माध्यममा प्रकाशित गरेका लेखहरूमा उल्लेखित शब्दहरू जस्तो भयावह अवस्था पाइएन। तिनको तुलनामा यसको प्रभाव साह्रै सूक्ष्म देखिएको छ,’ शोधकर्ताहरूले लेखेका छन्, ‘मानसिक स्वास्थ्य संकट यसअघि प्रस्तुती गरिएजस्तो भयावह पाइएन।’
शोधकर्ताहरूले पहिले सन् २०१८ देखि २०१९ बीचमा भएका मानसिक स्वास्थ्यसम्बन्धी अध्ययनहरूलाई सूक्ष्म रूपमा नियालेका थिए। र, विश्व स्वास्थ्य संगठनले सन् २०२० मा चीनमा कोरोना भाइरसको प्रकोप शुरु भएको सूचना दिएयता भएका अध्ययनहरूको विश्लेषण गरेका थिए।
अध्ययनको क्रममा मानसिक स्वास्थ्यका लक्षणमा परिवर्तन, डिप्रेसन, एन्जाइटीजस्ता स्वास्थ्य समस्या मिहिन रूपमा केलाइएको थियो। परिणाम- त्यस्ता समस्या अंकगणितको हिसाबबाट न्यून थियो। र, महत्त्वपूर्ण थिएन। ती अध्ययनहरू विकसित मुलुकमा बढी भएका थिए।
तथापि, मानिसका केही समूहमा मानसिक स्वास्थ्य बिग्रिएको भने देखिएको छ। खासगरी, महिलाहरूमा मानसिक स्वास्थ्य समस्या बढी देखिएको छ। तर, त्यो भयावह अवस्थामा देखिएको छैन।
ज्येष्ठ नागरिक, बयस्क, विश्वविद्यालयका विद्यार्थी तथा अल्पसंख्यक यौन र लैंगिक समूहसँग सम्बन्धित व्यक्तिहरूमा पनि मानसिक स्वास्थ्य समस्या देखिएको छ। यी समूहमा पनि त्यसको भयावह प्रभाव नरहेको शोधकर्ताहरूको निष्कर्ष छ।
महामारीका दौरान महिलाहरूमाथि अन्तरंग साथीहरूको हिंसामा वृद्धि भएको थियो, जसकारण उनीहरूको मानसिक स्थिति जटिल देखिनु चिन्ताजनक रहेको भने शोधकर्ताहरूको ठम्याइ छ।
साइन्स अलर्ट डट कमबाट
