मुम्बई- चर्चित बलिउड अभिनेता तथा निर्देशक सतीश कौशिकको निधन भएको छ।

६७ वर्षीय उनको बिहीबार बिहान निधन भएको हो। अभिनेता अनुपम खेरले ट्विटमार्फत कौशिकको निधन भएको पुष्टि गरेका छन्।

‘सतीश, तिमीबिना जिन्दगी पहिलेजस्तो हुने छैन। मलाई थाहा छ, मृत्यु नै यस दुनियाँको अन्तिम सत्य हो,’ खेरले लेखेका छन्। कौशिकको निधनको कारण खुलिसकेको छैन।

अभिनेता कौशिकको जन्म १३ अप्रिल १९६५ मा हरियाणामा भएको थियो। सन् १९८३ मा उनले बलिउड यात्रा शुरु गरेका थिए। त्यसअघि केही समय थिएटरमा पनि काम गरेका थिए।

सन् १९८७ मा आएको फिल्म ‘मिस्टर इन्डिया’बाट उनले चर्चा पाएका थिए। सन् १९९७ मा ‘दिवाना मस्ताना’मा उनको ‘पप्पु मेजर’को भूमिकाले चर्चा पाएको थियो। यस्तै, सन् १९९० मा ‘राम लखन’ र १९९७ मा ‘साजन चले ससुराल’का लागि उनलाई हास्य अभिनेताका रूपमा फिल्म फेयर अवार्ड प्राप्त भएको थियो।