काठमाडौँ । नेपाली चलचित्र ‘छक्कापञ्जा ४’ शुक्रबारबाट प्रदर्शन आएको हो । शुक्रबारदेखि फिल्म रिलिज भएलगत्तै दर्शकले टिकटकलगायत सामाजिक सञ्जालका प्लेटफर्ममा ५ मिनेटसम्मका भिडिओ पोस्ट गरिरहेका छन्। महत्त्वपूर्ण दृश्य नै टिकटकमा बाहिरिँदा निर्माता तनावमा छन्।
‘‘धेरै क्लिप्सहरू राखेर पूरा फिल्म नै टिकटकमा आउन थालेको छ। यसलाई नियमन गर्नुपर्ने चुनौती भएको छ,’’ निर्माता तथा अभिनेता दीपकराज गिरी भन्छन्। फिल्म हलमा नै कर्मचारी खटाएर यसबारे कडाइ गर्नुपर्ने उनको माग छ।
फिल्मको डिजिटल अधिकार ओएसआर किनेको हो । फिल्मको विभिन्न क्लिप बाहिरिएपछि डिडिजल अधिकार किनेका ओएसआरले अहिले साइबर ब्युरोमा उजुरी दिएको छ ।
फिल्मको क्लिप सामाजिक संजालमा बिना अनुमति ल्याउनु गलत भएकोले साइबर ब्युरोमा उजुरी दिएको ओएसआरका ओम अग्रवालले बताए ।
‘कसैको सम्पत्तिमाथि खेलबाड गरेर गलत तरिकाले बाहिर ल्याउनु हुँदैन’ अग्रवालले भने ‘यसरी एकएक गर्दै फिल्मको सबै क्लिप बाहिरियो भने हामी त बरबाद हुन्छौ ।’ डिजिटल राइटका लागि ‘छक्कापञ्जा ४’ आफूले महँगो रकममा किनेको बताएका अग्रवालले पायरेसी जसरी पनि रोक्ने बताए ।
राजनीतिक र कमेडी बिषयमा निर्माण भएको फिल्ममा दीपकराज गिरी, दीपाश्री निरौला, बेनिशा हमाल, रमेश बुढाथोकी, बुद्धि तामाङ, केदार घिमिरे, निर्मल शर्मा, नीर शाह, अनुराग कुवँर, राज आचार्य लगायतको मुख्य भूमिका रहेको छ ।