मुम्बई- शाहरुखको फिल्म ‘पठान’ले हालसम्मकै सर्वाधिक आम्दानी गरेर नयाँ रेकर्ड बनाएको छ।
समाचार एजेन्सी पीटीआईका अनुसार ‘पठान’ नम्बर वान बलिउड फिल्म बनेको छ। उक्त फिल्मले १ हजार २८ करोड भारतीय रुपैयाँ कमाइ गरिसकेको छ।
निर्माता यशराज फिल्म्सका अनुसार रिलिज भएको छैटौं शुक्रबारसम्ममा उक्त रकम आर्जन भएको हो। ‘पठान’ले भारतभित्र ६४१ करोड रुपैयाँभन्दा बढी र विदेशमा ३८६ करोड रुपैयाँभन्दा बढी कमाएको छ।
हिन्दी भाषामा मात्र उक्त फिल्मले ५२९ करोड रुपैयाँभन्दा बढी आम्दानी गरेको छ।
‘यो अदभूत हो, फिल्म ‘पठान’ भारतको नम्बर वान हिन्दी फिल्म बनेको छ। पठानले प्राप्त गरेको दर्शकको माया ऐतिहासिक छ। र, त्यो बक्स अफिसले नै बताउँछ,’ फिल्मका निर्देशक सिद्धार्थ आनन्दले भने, ‘यस फिल्मको निर्देशकका रूपमा मैले यति ऐतिहासिक सिनेमा बनाएँ भन्नेमा गौरव महशुस गरेको छु। मेरो निर्देशनको फिल्मले सारा दुनियाँलाई मनोरञ्जन दिएको छ।’
फिल्म ‘पठान’ सबैभन्दा तीव्र गतिमा आम्दानी गर्ने फिल्म बनेको छ। यसअघि आमिर खानको फिल्म ‘दंगल’ले चिनियाँ सिनेमा घरहरूमा समेत गरी २ हजार करोड भारु कमाएको थियो।
फिल्म पठान २५ जनवरीमा रिलिज भएको थियो। शाहरुखले ४ वर्षपछि आफ्नो फिल्म रिलिज गरेका थिए। सन् २०२३ मा उनका अन्य दुई फिल्म ‘डंकी’ र ‘जवान’ पनि रिलिज हुँदै छन्।