नेपित (एजेन्सी)- म्यानमारमा शनिबार मारिएका ११४ जना प्रदर्शनकारीको अन्त्येष्टिमा भाग लिएका मानिसमाथि पनि सुरक्षा बलले गोली चलाएको छ।
आइतबार यान्गोन नजिकै बागो टाउनमा आयोजित एक अन्त्येष्टि कार्यक्रममा चलेको गोलीबारीमा के कति क्षती भयो भन्ने यकिन जानकारी नभएको रोयटर्स न्युज एजेन्सीले जनाएको छ।
‘जब हामी क्रान्तिका गीत गाइरहेका थियौँ, तब सुरक्षा बल त्यहाँ पुगेर हामीमाथि गोली बर्साउन थाले,’ आय नामकी एक महिलाले भनिन्, ‘गोली चल्नेबित्तिकै हामीजस्तै थुप्रै मानिस त्यहाँबाट भाग्यौँ।’
यद्यपि, आइतबार अर्को एक स्थानमा चलेको गोलीका कारण दुईजनाको मृत्यु भएको छ। घटनाका प्रत्यक्षदर्शी तथा सामाचारका रिपोर्टले यसबारे जानकारी दिएका छन्। म्यानमारको नेपितमा आयोजित एक प्रदर्शनमा सुरक्षाबलको गोली लागेर एकजनाको मृत्यु भएको नाउ न्यूजले जानकारी दिएको छ।
आइतबार म्यानमारमा व्यापक मात्रामा खासै कुनै विरोध प्रदर्शन भएनन्। यद्यपि, विभिन्न स्थानमा अन्त्येष्टि कार्यक्रम भने आयोजना भएको थियो।
शनिबार मारिएका ११४ जनामध्ये ६ जना १० देखि १६ वर्ष उमेरका बालबालिका पनि रहेका छन्।
जापान, दक्षिण कोरिया, बेलायत र अमेरिकाले आइतबार संयुक्त वक्तव्य जारी गर्दै सैन्य कूको विरोध गरेका छन्। त्यस वक्तव्यप्रति अस्ट्रेलिया, क्यानाडा, डेनमार्क, जर्मनी, ग्रिस, इटाली, नेदरल्यान्ड्स र न्युजिल्यान्डले समर्थन जनाएका छन्।
