काठमाडौं- चीनमा कोभिडको अर्को लहर फैलिन थालेपछि नेपालमा बुस्टरका रूपमा मात्र लगाउन मिल्नेगरी कोभिड खोप मगाइएको स्वास्थ्य मन्त्रालयले जनाएको छ।

दुई खेपमा गरेर १५-१५ लाख फाइजरद्वारा उत्पादित ‘बाईभ्यालन्ट’ खोप पठाइदिन खोपसम्बन्धी विश्वव्यापी सञ्जाल गाभीसँग अनुरोध गरिएको अधिकारीहरूको भनाइ छ।

‘सुरक्षित हुनका लागि खोपको विकल्प छैन भन्ने हाम्रो पुरानै मान्यता कायम छ। र, त्यसका लागि कोभिड खोप कार्यक्रम जारी नै छ,’ स्वास्थ्य मन्त्रालयका प्रवक्ता डा. सञ्जयकुमार ठाकुर भन्छन्, ‘नयाँ–नयाँ भेरियन्ट आउँछन्। अब खोपको तेस्रो मात्रा नलाउँदा पहिलेका मात्राले ‘हर्ड इम्युनिटी’ कायम नरहन सक्छ।’

चीनमा फैलिएको ओमिक्रोनको सब-भेरियन्ट बीएफ.७ भारतमा पनि देखा परेपछि केही साताअघि नेपाल सरकारले ‘जोखिम उत्पन्न भएको’ भन्दै सर्वसाधारणलाई सजग गराएको थियो। तर, अहिलेसम्म कोरोनाको उक्त भेरियन्ट नेपालमा देखापरेको छैन।

नेपालमा दुई वर्षअघि अर्थात् जनवरी २०२१ देखि कोभिड खोप दिन थालिएको हो। ६ महिनापछि खोपले विकास गराउने रोग प्रतिरोध क्षमता क्षीण हुँदै जाँदा ‘हर्ड इम्युनिटी’ अर्थात् सामुदायिक प्रतिरोध क्षमता घट्दै जाने विज्ञहरू बताउँछन्।

स्वास्थ्य सेवा विभागको आपूर्ति व्यवस्थापन शाखाका प्रमुख डा. सुरेन्द्र चौरसियाले पहिलो र दोस्रो मात्रा खोप ‘बहुसंख्यक मानिसले लगाइसकेका र बाँकीका लागि अन्य खोपहरू उपलब्ध रहेकाले’ अबको जोड बुस्टर खोप लगाउनुमा हुने बताए।

झन्डै चार महिनाअघि सार्वजनिक गरिएको सरकारी विवरणअनुसार लक्षित उमेर समूह अर्थात् १२ वर्ष र माथिल्लो उमेर समूहमा झन्डै ९६ प्रतिशतले कोभिड खोप लगाएका छन्।

गाभीमार्फत् पहिलो खेपमा आउने १५ लाख मात्रा खोप अनुदानमा आउनेछ। त्यसप्रति सर्वसाधारणहरूको रुचि हेरेर मात्रा थप १५ लाख मात्रा खोप मगाइने योजना सरकारको छ।

डा. चौरसियाका अनुसार १२ वर्षमाथिको सबै उमेर समूहका लागि बुस्टरका रूपमा लगाउन मिल्ने र तेस्रो मात्रा लगाएको ६ महिना नाघेकाको हकमा अब आउने खोप लगाउन दिइनेछ।

स्वास्थ्य मन्त्रालयले थप खोपका लागि बजेट अभाव नरहेको उल्लेख गर्दै बुस्टर डोज लगाउन सर्वसाधारणलाई आग्रह गरेको छ। ‘अब आउने खोप ओमिक्रोन भेरियन्टका लागि लक्षित गरिएको तथा बुस्टरका रूपमा राम्ररी काम गर्ने बाईभ्यालन्ट खोप हो,’ डा. ठाकुर भन्छन्।