काठमाडौँ । सुपथ मुल्यको सामान बेच्न सरकारले सञ्चालन गरेको साल्ट ट्रेडिङ कर्पोरेसनको गण्डकी प्रदेश कार्यालयले यो वर्ष नुन मात्रै बेच्ने भएको छ । ट्रेडिङका अन्य शाखाहरूले उपभोग्य सामग्री सस्तोमा बेचिरहेका बेला पोखराले नुनबाहेक अरु नबेच्ने भएको हो ।
दसैं, तिहार र छठ पर्वका लागि हरेक वर्ष साल्ट ट्रेडिङले सुपथ सामग्री बेच्दै आएको छ । यसअघि खसीबोकादेखि चामलसम्म बिक्री गरेको साल्टले अहिले नुन मात्रै बेच्न लागेको हो । चिनी र अन्य सामान आयात नहुँदा नुन मात्रै बेच्न लागिएको कार्यालय प्रमुख बासुदेव उपाध्यायले जानकारी दिए ।
प्रतिकिलो नुनको मूल्य १८ रुपैयाँ छ । प्रत्येकले ६ किलोका दरमा नुन खरिद गर्न सक्ने उनले बताए । ‘पहिले सुपथ मूल्यका पसल चलाएका थियौँ, अहिले नुन मात्रै आयात भयो, चिनी र अरु सामान आएन,’ उनले भने, ‘यो दसैंमा नुन मात्रै बेच्छौँ ।’ अघिल्लो वर्ष ३ किलो नुन र ३ किलो चिनी बिक्री गरेको थियो ।
त्यसअघि चामल, गेडागुडी, नुन, तेल, चिनी, साबुनलगायत दैनिक उपभोग्य वस्तुहरू बिक्री गथ्र्यो । बजारमा नै सामान सजिलै पाइने भएकाले आफूहरूले जोड नगरेको उनले बताए । चाडवाडमा बजार महंगो हुने भएकाले कर्पोरेसनले नै सामान बेच्दा उपभोक्ताको विश्वास पाएको उनले सुनाए ।